Shillong, Jymmang, 11: U Symbud Myntri Rangbah uba khmih ïa ka tnat Pynroi Sor Bah Sniawbhalang Dhar ha ka sngi U Blei u la kyntait war ïa ka jingkynnoh ba dang shen da ka HNLC ba u ju bei tyngka ïa ka seng ha ka por ba u dang long u Myntri ha ka Sorkar ba la ïalam da ka Congress bad ong, “ka dei tang ka buit saiñpyrthei” ban pynjah burom ïa u.
“Sngewsih ba ngam don ha nongbah ha ki khyndiat taiew.
Ka jingkynnoh jong ka HNLC ka long kaba lamler bad ka bym don nongrim. (Kumjuh ruh) na ka jingkren jong kiwei pat ki nongïalam jong ki saiñ pyrthei, ka paw kumba ka dei ka buit saiñ pyrthei tang ban pynjah burom ïa ka longryngieng jong nga,” ong u Bah Dhar haba kren sha ki nongthoh khubor.
“Sngewbha kynmaw, katba ki dang kwah ban pynsaphriang bym dei pyrshah ïa nga, U Blei Un kyrkhu ïa nga, ïa ka party bad ïa ka Sorkar namar nga don hangne ban shakri ïa ki paidbah jong nga da kaba hok. Ngi don hangne ban ïada ïa ki paidbah, ïa ka jylla bad ïa ka ri baroh kawei. Ngi dei ki nongïalam jong phi, sngewbha shaniah ha ngi namar kine baroh ki dei ki jingkynnoh bym don nongrim,” u la bynrap.
Halor ka jingdawa jong ka Congress bad ka VPP ban pynhiar shuki ïa u khnang ban plie lad ïa ka jingtohkit halor ka jingkynnoh, u Bah Dhar u la ong ba um pat long uba kloi ban hiar na ka shuki Symbud Myntri rangbah namarba ka jingkynnoh ba la pynpaw da ka HNLC ka long ka bym don nongrim satia.
“Kane ka dei ka jingdawa na ka liang pyrshah. Ka dei ka kamram jong ki hynrei ban dawa ban hiar shuki phi dei ban don ïa ki sakhi sabut kiba biang. Lada nga risaiñ kata ka mut ba nga pdiang ïa ka jingkynnoh, kaba ngam thmu ban leh bad ngan ym salia hi ruh namarba nga don hangne ban shakri ïa ki paidbah jong nga ym ban shakri ïa ki lehnoh, sngewbha kynmaw ïa kata. La 17 snem kum u MLA nga la shakri ïa la ka jong ka jylla. Nga ieid ïa la ki jong ki paidbah bad ngan pynshisha ban trei shitom shuh shuh na ka bynta ki paidbah jong ka jylla. Ki jingkynnoh ki dei kiba lamler suda,” u la bynrap.
Haba kylli hato un shim neem ai kano kano ka sienjam da kaba ujor ejahar, u Symbud Myntri Rangbah u la ong, “ngan peit shwa namarba tang da kaba pyrkhat ngam tip mano ba donkti ha lyndet hynrei ka lah ban long lada nga lap mano ba don kti ha lyndet ngan hap ban leh kumta.”
“Ngin sa peit (kaei) kaba nga lah ban leh. Phi tip ba ka dei ka seng ba la shah kheiñ be-aiñ. Phi tip ba teng teng la pynphriang ïa ka khubor thok. Ngin hap ban peit bniah la ka dei ka mat kaba khia ne em, ngin sa ïohi hynrei ka dei ka jingkynnoh kaba khlem nongrim bad ka long kaba bakla suda,” u la ong.
“Ka rukom kren ka la wan ruh na ki seng saiñ pyrthei. Kumta bun ki briew ki kwah ban pynphriang ïa ka jingkynthoh pyrshah ïa nga shimet hynrei ngam khuslai namarba ka kamram jong nga ka long ban trei na ka bynta ki paidbah jong ka jylla bad ban kyntiew ïa ka jylla. Kata ka dei ka jingthmu jong nga bad kata ka dei ka jingthmu jong ngi ruh kum ka sorkar.”
