Shillong, Jymmang, 30: U nongaiktien ka Sorkar MDA uba dei ruh u Myntri ka Rorkar, Bah Paul Lyngdoh ha ka sngi Thohdieng u la ong ba um sngewphylla satia ïa ki jingkynnoh pyrshah da ki seng saiñpyrthei kiba heh kiba ïaknieh ban ïoh bat ïa u lakam synshar ha Assam ha shwa ka elekshon sha ka Iingdorbar Thawain ka ban sa long.
Kane ka jingkynthoh jong u Bah Paul ka long halor ka jingkynnoh ba la pynpaw da u President ka seng Congress na Assam u Gaurav Gogoi ba ka kynhun tih dewiong beaiñ kaba trei kam ha Assam bad Meghalaya kan ym lah ban treikam khlem ka jingïada na ka Sorkar Pdeng bad ka Sorkar Jylla.
Ka jingkren jong u Gogoi ka long hadien shibnai tam hadien ba ka Enforcement Directorate (ED) ka la pynlong ïa ka jingkhynra ha ki 15 tylli ki jaka kiba don ha Jadigittim bad Nongalbibra ha Meghalaya, nalor ka Jogighopa (Bongaigaon), Margherita (Tinsukia) bad Guwahati ha Assam, kaba long shi bynta ka jingtohkit ïa ka bamsap kaba ïadei bad ka jingtih dewiong be-aiñ bad ka jingtreikam jong ki karkhana Coke ha Meghalaya.
“Ngam sngewlyngngoh namarba kane ka dei ka saiñpyrthei bad ka dei ka por ba ki ar tylli ki kynhun radbah kiba ïaknieh ïa ka bor synshar ha Assam kin pynmih ïa ki jingkynnoh bapher bapher. Ki jingkynnoh ki la mih na u Myntri Rangbah ka Assam pyrshah ïa u Gogoi bad kumjuh ruh u la pynphai kylla ïa ki jingkynthoh,” ong u Bah Paul ha ki nongthoh khubor.
“Ka Meghalaya na ka bynta jong ki ka shu long diengshaiñdoh namar ki donkam ïa u briew ban pynlong sohpdung bad ngi jia ryngkhat ba long ki paramarjan jong ki kumta ngam sngew lyngngoh hynrei phin sa ïohi hadien ka elekshon ka sur jong ki kan sa kylla,” u la bynrap.
