Shillong, Naiwieng 06: U Vice President jong ka Federation of Khasi Jaiñtia and Garo Peoples (FKJGP) u samla Kitboklang Nongphlang la pynpaw ba ka jingkynrei jong u drok ha ka nongbah Shillong ka dei ka jinghiar thma ba jarjar jong ki mynder ia ka jaitbynriew.
“Bun ki samla khasi kiba la ngop ha u jingdih pynbuaid ki dei tang ki langknia katba kiba pynpoi bad pynngop pat ia u jingdih bunsien ki dei beit ki khyllah jait,” la ong u nongialam ka FKJGP haba kren jingialang pynskhem ia ki dkhot kiba la pyniasoh ialade bad ka seng kaba la long ha ophis treikam jong ka Seng ha Mawlai Kynton Massar, Shillong ha ka 3 tarik mynta u bnai.
“Kum ki dkhot jong ka seng ki dei ban long kiba phikir, kiba peitngor bad ban long kiba la khreh ban iakhun thma pyrshah u drok uba la bam kruiñ ia ka jaitbynriew,” u la ong.
Ha kane ka sngi, ka seng ka la lum lang ia ki nongialam jong ki Circle kiba kiba don ha ka nongbah Shillong ban shim ia ki sienjan ban pynkhlain ia ka rukom treikam jong ka seng khamtam eh ha ka nongbah Shillong.
Ha ka jingialang, ba la pyniaid da u Chief Organising Secretary jong ka FKJGP Central Body u Bah Khrawkupar Nongsiej la don lang ruh u President jong ka seng u Bah Dundee Cliff Khongsit, u Senior Vice President Bah Elton Cliff Warjri bad u General Secretary Bah Eldie N Lyngdoh.
U Bah Elton C. Warjri, haba kren ha kane ka jingialang u la pynkynmaw ia ki lynti iaid jong ka seng ha ki snem 2014 terter ha kaba ki dkhot ki dei ban don ia ka mynsiem kaba shitrhem ban shakri ia ka jaitbynriew hi baroh kawei.
U Bah Eldie N. Lyngdoh, uba la long teng ruh u Geneneral Secretary ka FKJGP Shillong City ha u snem 2014 u la pynkynmaw ba ki dkhot jong ka Shillong City ha kitei ki snem ki la mad shibun ki jingshah tynjuh lyngba ki jingshahkem, ka jingshah bom shah tied haba ki pyrshang ban iakhun ia kiba bun ki mat na ka bynta ka dawbah jong ka jaitbynriew hynrei kaba sngewtynnad pat ka long ba haduh mynta ka nongrim ka skhem bad kam lah satia ban theh umpjah ia ka mynsiem ieit ri bad u la kyntu ruh ia ki dkhot ba kin nang iai trei shitrhem shuh shuh ban aiti met bad mynsiem na ka bynta ka jaitbynriew.
Hashwa ban pynskhem ia ki nongkitkam ba thymmai jong ka FKJGP Shillong City na ka liang jong u Bah Dundee Cliff Khongsit, u la pynshai ia ki nongrim bad ia ki mat treikam jong ka seng da kaba ong, ‘shisien ba phi la pyniaisoh ialade bad ka FKJGP to tip shai ba shiliang ka kjat ka la dei ban don lypa ha ka along bad shiliang pat shabar.”
U la kyntu ruh ba kum ki dkhot ki dei ban don ia ka mynsiem kaba shynrang ka bym tieng, bym khawpud bad ka mynsiem kaba ym pyndem satia ban iakhun na ka bynta ka dawbah jong ka jaitbynriew ha kaba u la maham pat ba ki dkhot jong ka seng kim dei satia ban long ki khwan myntoi na ka bynta ka malade.
Ki nongialam bad ki dkhot ba la shah pynskhem na ka bynta ka samoi treikam jong u snem 2023-26 ka FKJGP Shillong City ki long, President Arkinfield Khonglam, Vice-President Simon Myrthong, General Secretary Shane Nongrum, Joint Secretary Wanpyndap Marbaniang, Asst. Secretary Kyrshan Syiemlieh, Organising Secretary Alfredy Kharbuli, Barilang Pyngrope, Donkupar Dympep bad Dapkmen Syiemiong, Information Secretary Embhahlang Talang, Asst. Information Secretary Secretary Sherborn Shabong, Education Secretary Garry N. Thangkhiew, Asst. Education Secretary Boney Jyrwa, Socio & Cultural Secretary Larikupar Lyngdoh, Asst. Socio & Cultural Secretary Bantei Nongkhlaw, Sports Secretary Donavan Pyngrope, Asst. Sports Secretary Batkupar Nongkhlaw, Disciplinary Secretary Rist Thabah , Asst. Disciplinary Secretary Kordor Lyngdoh, Environmental Secretary Hopewell Kharkongor, Asst. Environmental Secretary Collin Turnia, Agriculture Secretary Arban Katrai, Asst. Agriculture Secretary Mark Wahlang.
Nalor kine ki nongkitkam la la jied ruh ia ki 36 ngut ki dkhot na kylleng ki jaka kiba hap ha Sor bad Khapsor kum ki dkhot sha ka Executive Committee jong ka FKJGP Shillong City.
