Shillong, Nohprah, 18: Ka Meghalaya Pradesh Congress Committee ka la kynnoh ba ka jingwanrah ïa ka Viksit Bharat–Guarantee for Rozgar and Ajeevika Mission (Gramin) da ka BJP kaba bat ïa u lakam synshar ha ka Sorkar Pdeng ka don beit ïa ka jingthmu ban pynduh noh ïa ka National Rural Employment Guarantee Scheme (NREGS) ba la wanrah da ka Seng Congress mynba ka dang bat ïa u lakam synshar hapoh ka ri ha ki snem ba mynshwa.
Ha ka jingïakren bad ki lad pathai khubor ha ka sngi Palei u Chief Organiser ka Seva Dal u Bah Banphira Basaïawmoit u la khot bad wer ruh ïa ki seng saiñ pyrthei kiba don hapoh ka jylla ban ieng pyrshah ïa kane ka jingthmu jong ka BJP kaba long kum ka jingpynduhkam duhjam ïa ki paidbah ha ki shnong nongkyndong.
U Secretary jong ka MPCC u Bah Manuel Badwar haba bynrap lang halor kane u la ong ba ka jingtyrwa jong ka Sorkar Pdeng ban pynjlan ïa ka jingaikam na ka 100 sngi sha ka 125 sngi ka shong beit ha ka jingpynmih ka sorkar ïa ka jingpynbna bad katkum ka jingmang pisa na Delhi.
