Shillong, Nailar, 08: Lai tylli ki dukan ba la pynïaid da ki bar jylla kiba ju die ïa ki jingbam ha East Jaintia Hills ki la shah khang khyrdep ha ka tnat Food Safety hadien ba la shem ïa ka jinglehsih, ka jingbym leh khuid ïa ki tiar ba pyndonkam ban shet ïa ka bam ka dih kaba lah ban ktah ïa ka koit ka khiah jong ki paidbah.
Ki lai tylli ki dukan kiba la shah khang khydop ki kynthup ïa kawei ka Exotic Restaurant kaba don ha Khliehriat bad ar tylli ki dukan shna Ice Cream ba khlem kyrteng kiba don ha Dkhiah, East Jaintia Hills District ba la pynïaid da ki bar Jylla.
Ïa kine ki dukan la phah khang da ka Deputy Commissioner ka tnat Food Safety ka Kong DBS. Mukhim ha ka jingjurip ïa ki dukan die marbam ha East Jaintia Hills ha ka 7 tarik, Nailar, 2025 ba la synran lang da ka Assistant Commissioner jong ka Food Safety Jaintia Hills ka Kong E. Pyngrope, u Food Safety Officer ka West Jaintia Hills District u Bah P.W Lyngdoh bad ki Pulit.
Ha ka jingjurip ïa ki dukan ha East Jaintia Hills District, kine ki ophisar jong ka tnat ki la lap ïa ka jingtngit bad ka jingjaboh jong ki dukan, wat ki nongtrei ruh ki long kiba ja-ing.
Kane ka jinglong jingman bad jingbym lehkhuid ka buh jingma ïaki paidbah nongbam nongdih, la ong ka Kong Mukhim.
Ka tnad Food Safety ka la bthah ïa kine ki dukan ba kin khang khyrdep haduh ba kin pynbiang lut ïa baroh ki jingbthah kynthup ïaki kot ki sla bad ka jingkhuid jingsuba.
Ha ka jingleit jurip ïa ki dukan die doh masi bad dohsniang ha Ïawmusiang, Jowai, West Jaintia Hills District ka Kong DBS. Mukhim ka la pyntip ba shen kan sa khot da ka jingïalang ïa ki nongdie doh bad ki nongpynïaid ïa ka iew ha Jowai ban ïamir jingmut kumno ban wanrah ïa ka jingleh khuid jong ki dukan die doh.
