Shillong, K’lyngkot, 12: Ka seng kieng atiar Hynñiewtrep National Liberation Council (HNLC) ka la kyntait ïa ka jingkren ba dang shen jong u Myntri Rangbah ka Jylla u Conrad K. Sangma ha kaba ïadei bad ka jingthaw ïa ki Land Bank hapoh ka Investment Meghalaya Agency (IMA).
“Kane ka jingkren ka pyrshang ban pynduna ïa ki jingma jong ka jingthmu shim jaka jong ka IMA, ka long kaba ïalam bakla bad ka buh ïa jingma kaba khraw ïa ka jingsynshar laitluid bad ka hok longtrai jong ka jaidbynriew Hynñiewtrep,” ong u kyrwoh ba la phah ha ka sngi u Blei da u General secretary cum Publicity Secretary ka HNLC u Bah Saiñkupar Nongtraw.
“Ka jingpynthikna jong u Myntri Rangbah ba ka Land Transfer Act kan ïaineh ka long tang ka jingpyrshang ban pynduna ïa ki jingsngewkhia katba ka pynkha pat ïa ki jingbakla na ka bynta ban jingpyndonkam bakla ïa ki jaka ki puta. Ka jingthmu jong ka IMA ka long ban thied bad ban pynïaid ïa ka jaka ka ïaid lait na ka jingthmu jong ka Land Transfer Act kaba la shna khnang ban ïada ïa ki jaka jong ki trai ri trai muluk na ka jingshah kyntur pud. Ka jingai bor ïa ka tnad treikam jong ka Sorkar ban long kum ka Land Bank ka pynduhjait ïa ki rukom pynïaid jaka ki trai jylla, kiba la pynneh ïa ka snap bad ka lariti jong ngi la bun spah snem,” ong shuh shuh u kyrwoh.
Ka jingong ba ka IMA kan ym ïaidlait ïa ki Autonomous District Council (ADC) ne ki Dorbar Shnong ka long kaba lamler. Da kaba pynlong pdeng ïa ka jingshim rai kaba ïadei bad ka khyndew hapoh ka IMA, ka Sorkar ka ïaid lait ïa ki tnad kiba la pynrung ha ka Khyrnit Bahynriew kaba ïada ïa ka bor synshar laitluid jong ki riewlum. Kane ka jingleh ka pyntlot ïa ka bynta jong ki ADC bad ki tnad tynrai, ka pynlong ïa ki ban long tang ki nongpeitkai ha kaba shim kabu ïa ki jaka jong ki kpa tymmen, la kynthoh ka HNLC.
“Ka jingmut jong ki Land Bank, kaba la wanrah ha ka dur ban kyntiew ïa ka jingbei tyngka, ka pynlong mar ïa ka jaka kaba la long trai bad pynïaid lang da ki pateng bynriew. Ha ka imlang sahlang u Hynñiewtrep, ka khyndew ka shyiap kam dei tang ka spah hynrei ka dei hi ka nongrim jong ka jinglong tynrai bad ka rukom im jong ngi. Ka jingthaw ïa ki Land Bank ka byrngem ruh ban pynduh ïa kane ka jingïadei kaba kyntang da kaba plie lad ïa ka jingshah pynkynriah jaka, ka jingpynjot ïa ka mariang, bad ka jingpyndonkam ïa ki marpoh khyndew,” la ong ka HNLC.
Ka jingpynïasyriem bad ki shnat treikam kum ka Meghalaya Industrial Development Corporation (MIDC) and Meghalaya Tourism Development Corporation (MTDC) ka dei tang ka jingpyrshang ban pynlong tynrai ïa ka itkiar kaba triem jong ka IMA. Hynrei, ym kum kine ki Corporation, ka bor jong ka IMA ka bym pat ju don mynno mynno ruh ban pynïasoh bad ai wai ïa ki jaka kiba heh ka buh jingeh beit ïa ka rukom longtrai jong ki nongshong shnong kaba la ïada ïa ki jaka jong ngi la bun spah snem,” la pynpaw ka HNLC.
Da kaba pynskhem ba ka jingkiew ha ka ïoh ka kot kam lah ban wan ha ka jingduhnong jong ka jingsynshar da lade jong ki trai ri trai muluk bad ka jingsumar ïa ka khyndew ka shyiap, u nongïalam jong ka HNLC u la ong, “ka jaitbynriew Hynñiewtrep ka la sakhi ïa ki jingkular ba thylli jong ka roi ka par mynshuwa, ha kaba ki briew kiba nabar bad ki riew pawkhmat ki ïoh ïa ki jingmyntoi katba ki trai ri trai muluk ki kit ïa ka jinglut jingsep. Ki jaka ba la tyrwa kim pher shuh kin pynriewspah ïa ki katto katne ha ka jingduhnong jong kiba bun, da kaba iehnoh ïa ki briew jong ngi ki bym don jaka bad kiba rit paid.”
“Ka jingdawa jong u Myntri Rangbah ban ïada ïa ki jingmyntoi jong ki trai ri trai muluk ka sawa haba ki jingthmu jong ka IMA kim don ka jingshai bad ka jingïamir jingmut kaba don jingmut bad ki bor synshar trai ri. Ki rai halor ki jaka ki puta dei ban shim da ka jingmynjur jong ki paidbah, ym ban pynbor da ka tnad kaba trei na ka bynta ki nongbei tyngka nabar. Khlem da pynpaw pura ïa ki jingthmu jong ka IMA, ki paidbah Hynñiewtrep ki don ka daw kaba biang ban ym shaniah ïa kane ka jingthmu,” u la bynrap.
Shuh shuh, u Bah Nongtraw u la kynnoh ba ka jingthaw ïa ki Land Bank hapoh ka IMA kam dei tang ka polisi, ka dei ka jingthombor beit beit ïa ka hok longtrai bad ka nongrim kolshor jong ka jaidbynriew Hynñiewtrep. “Ka jaka jong ngi kam dei ka mar ban thied ban die. Ka long ka nongrim jong ka pateng jong ngi, ka tynrai jong ka kolshor jong ngi, bad ka snam jingim jong ka lawei jong ngi.”
Da kaba pynpaw ba ka HNLC kan pyrshah ïa kano kano ka jingpyrshang ban pynduhjait ïa kane ka jingïadei kaba kyntang, u la ong ba ka kynhun ka khot ïa baroh ki jaidbynriew trai ri, ki nongïalam jong ki dorbar trai ri bad ki nongkyrshan ban ieng tylli ban ïada ïa ki jaka tynrai jong ngi.
“Ki kpa tymmen jong ngi ki la ïakhun da ka jingshlur ban pynneh pynsah ïa ka khyndew ka shyiap bad ka jinglong trai jong ngi. Mynta ka sngi, ka la dei ka por jong ngi ban burom ïa ka mynnor jong ki da kaba pyrshah ïa ki polisi kiba buh jingma ïa ka jingdon jingem jong ngi. Ai ba ka Sorkar bad ki tnad treikam jong ka kin tip ba ka jaidbynriew Hynñiewtrep kan ym aiti ïa ka jingsynshar hok jong ka halor ka khyndew ka shyiap sha u nongthep dor ba heh tam,” ong u Bah Nongtraw haba dawa “ngi pynskhem ïa ka jingpynsangeh noh mardor ïa ka jingbthah jong ka IMA ban shim jaka, ka jingshai kaba pura ha kaba ïadei bad ki jingtreikam jong ka, bad ka jingburom kaba khlem artatien ïa ka bor jong ki bor synshar tynrai ha baroh ki kam kiba ïadei bad ka khyndew.”
