Shillong, Jylliew 10: U Myntri ka tnat Pule Puthi ka sorkar jylla u Rakkam A Sangma ha ka sngi baar u la ong ba lada pyntreikam ïa ka inner line permit (ILP), ha Meghalaya, kam dei ban don ka jingktah ïa ki nongwan jngohkai kiba wan sha kane ka jylla.
“Kan long kaba bha bad kaba biang lada la lah ban wanrah ïa ka ILP khnang ba ngin lah ban thaw ki kyndon na ka bynta ka rung ka mih jong ki briew kiba wan nabar. Hynrei ka lah ban long ka ILP ne kano kano ka rukom treikam hynrei kam dei pat ban pynsangeh ïa ka jingwan ki nongjngohkai sha kane ka jylla naba ki tourist ki long kiba ai ja bad ba bsa ïa ka jylla,” ïathuh u Sangma sha ki lad pathai khubor.
Haba ong ba ka kam jngohkai ka dei ka bor ba pynkhlaiñ ïa ka ïoh ka kot jong ka Meghalaya, u Myntri u la ong, “Namar kata ka tourism kadei ban kiew ban heh ban san bad kadei ban ai jingmyntoi ïa ki paidbah, kiba ïoh ïa ka lad kamai jakpoh na kane, kumta ai ba ngin ïatreilang khnang ba kam jngohkai kan kiew ha baroh ki liang.”
Haba pynpaw ka jingsngewkhia halor ka kam rung beaiñ ki mynder ri, u Sangma u la ong ba ka jylla ka donkam ïa ka ILP ban thaw ki kyndon halor ka jingwan tuid jong ki briew kiba nabar bad ka jingwan rung kyrthep ki mynder ri.
Katba ka Meghalaya ka dang ap ïa ka jingai jingmynjur jong ka sorkar pdeng ban pyntreikam ïa ka ILP, u Myntri u la ong ba ha kawei ka liang ka jylla ka la dep don lypa ïa ki rukom treikam kum ka Sixth Schedule, Land Transfer Act bad ka Meghalaya Residents Safety and Security Act (MRSSA), 2016 ban khmih ïa ka kam wan rung beaiñ ki mynder ri bad ki briew kiba nabar jylla.
“Ïa ngi la pynkupbor. Ngi la don ki Dorbar Shnong, ngi don ki Nokma ha manla ki shnong bad ngi la biang lut ïa ki rukom treikam ban lap la ka don kano kano ka jingwan sah beaiñ ki briew nabar ne bar ri. Hynrei kane kan treikam bha tang lada baroh ki shim lang ïa ka jingkitkhlieh. Lada manla ki Dorbar Shnong, ki Nokma ki khmih bniah bad lap ïa ka jingwan rung beaiñ ki briew nabar ri, mano ki ban wan naba ka khyndew ka shyiap kadei ka jong ngi, ka jaka puta ka dei kaba la longtrai da ka jaitbynriew, kumta kam mut ba ngi hap ban thied ïa ka khyndew bad ban sah hangne, ki don bun ki rukom treikam ba hap ban pyndep bad bud ha kaba ïadei bad ka jaka puta. Ngi don ki district council bad ki jingai NOC na ki district council kiba donkam ban ïoh, kumta ngam tharai ba kan long kaba suk na ka bynta jong ki ba kin shu wan bad ban sah ha Meghalaya,” u la bynrap.
