Shillong, Nailar, 25: U MP ka Congress MP na Tura u Saleng A Sangma u la pynsngew ha ka Sorkar Pdeng halor ka jingrung tuh jong ki Rohingya bad ka jingmih pyrthei jong ki kynhun lehnoh ha ka jylla Meghalaya.
“Dang khyndiat sngi mynshwa ngi la don ïa ka jingïalang ïamir jingmut jong ka Ministry of Home Affairs ha kaba nga la pynsngew ha u Myntri Kam Pohïing jong ka Sorkar Pdeng u Amit Shah ha kaba ïadei bad ki Rohingya kiba rung sha ka jylla Meghalaya kumjuh ruh ka jingmih biang jong ki lehnoh ha ka jylla,” ong u Sangma ha ki lad pathai khubor ha ka Lah Sngi u Blei.
“Haba ngi kren shaphang ki Rohingya, ki shipai Arakan ki lah ban rung sha kane ka jylla Meghalaya phim lah ban tip,” u la ong.
Halor ka jingkynnoh ba ki lehnoh ki la mih biang ha Meghalaya, u Sangma u la kynthoh ïa ka Sorkar namar ka jingbym leh eiei jong ka da kaba ong ba ka tbit bha tang ha ka “jingpyni rong”.
U la kynnoh ba ka Sorkar ka khynñiat biang ïa ki samla bad ki bym donkam donjam sha ki kam lehnoh.
“…ka dei ka jingbakla hi jong ka Sorkar. Ka jingkren shaphang kiei kiei kiba heh bad ka jingseng kam seng jam bad kane bad katai hynrei baroh ka dei ka jingleh thok bad lym kumta balei ki khun jong ngi hi kin leit phai biang sha khlaw. Balei ki leit? Hato ki pep skul shiteng por, hato ki shah lehbeiñ? Hato ka la don kano kano ka jait jingeh jong ki ha kaba ki la shah pynshitom ha kino kino ki jingeh shimet,” la ong u Sangma.
U la ong ba ka jingmih biang jong ki lehnoh ha ka jylla ka dei ka mat kaba sngewkhia ïa uwei pa uwei u nongshong shnong ha ka jylla namarba ki dang pyrkhat ba kita ki sngi kiba shyrkhei jong ki lehnoh ki la kut noh.
U MP ka Tura u la thoh sha u Myntri Rangbahduh, u Myntri kam pohïing u bad Myntri kam Bar-ri da kaba pynpaw ïa ki mat bapher bapher kynthup ïa ka jingdih drok, ka jingpahara khappud, ka jingker sainar bym skhem, ki jaka talasi bad ka jingpynroi ïa ki jingtei hadien ka la leit jngoh ïa ki thaiñ khappud dang shen.
U Sangma u la pynskhem shuh shuh ïa ka jingdonkam jong ka Sorkar Meghalaya ba peitngor haba khein ïa ka jingjan sha u pud u sam hadien ka jingïohkem dang shen ïa ki runar bad uwei u Pulit Havildar na ka ri Bangladesh ha South West Khasi Hills District.
U la ban jur ruh ïa ka jingdonkam ban buddien ïa ki jaka rung bad mih beaiñ bad ban pynkupbor ïa ki nongshong shnong da ki tiar ban ïada ïalade.
“Phi pyrkhat kumno shaphang ki runar kiba la shah kem dang shen ha Ranikor, kim dei tang na kawei ka District. La kem ïa ki bad uwei u Pulit Havildar ka Bangladesh. Lada ki dei ki dei tang ki runar barit baria kin jin da la wan tang na kawei ka shnong” u la bynrap.
“Kumta ka Sorkar ka dei ban peitngor, ka dei ban buh ïa kano kano ka lad ha kaba yn lah ban buddien ïa ka jingrung bad jingmih beaiñ. Ngim dei ban shu shaniah ha ka Sorkar Pdeng. Namar ba ka don hajan u pud u sam ka jylla jong ngi ka dei ban kham husiar ha ka thaiñ khappud. Kumno ki briew jong ngi ki im, hato ngi lah neem ban ïada ïa ki briew jong ngi ha khappud bad hato ki briew jong ngi ki don neem ïa kino kino ki jait tiar ban ïada ïalade – ïa kita kiei kiei dei ban shim khia bha,” la pynpaw shuh shuh u MP.
