Shillong, Jymmang, 06: Ka All Meghalaya Multipurpose Community Base Rehabilitation Workers Union (AMCBRWU) kaba long ka dkhot jong ka AITUC ka la dawa ïa ka Sorkar Jylla ban kyntiew ïa ka jingsiew sha ki Community Base Rehabilitation Workers (CBRW) bad sha ki Multipurpost Rehabilitation Workers (MRW).
Ka Union ka la shim ïa kane ka rai ha ka jingïalang kaba la long ha ka Lah Sngi u Blei ha kaba la don lang u Secretary jong ka AITUC Bah R. Thabah, u Vice-President Bah F. Nongkynrih, Kong D. Lyngdoh kaba mihkhmat na ka Aganwadi Union bad u Secretary barim jong ka CPI u S. Gupta.
Ha u kyrwoh ba la phah sha ki lad pathai khubor ba la soi da u President Bah H. Bamon bad ka General Secretary Kong RK Rymmmai ki la pyntip ba la jan 20-23 snem ki MRW bad ki CBRW ki la trei ïa ka kam hapoh ka jingkhmih jong ka District Social Welfare Department na ka bynta ban lum jingkheiñ bad ban ithuh ïa ki briew kiba don jingduna ha ki dkhot met khnang ban ïoh ai jingïarap bad ban pynpoi sha ki jaka sumar ha ki hospital sorkar bad ban pynïoh ïa ki Disabled Certificate katkum ka jingthud ba ki don ha ki dkhotmet.
“Ka kam ka long kaba jwat namarba manla iwei pa iwei ki CBRW ki hap ban leit rung ym duna 20-25 tylli ki shnong bad ki MRW ki hap ban leit rung sha ki 40-50 tylli ki shnong nongkyndong ka jylla. La siew honorarium sha ki Office Assistances tang T. 12,480 hajar bad ïa ki CBRW tang T. 10,114 khlem da ai pat ïa ka TA. & DA,” ong u kyrwoh.
“Namarkata, ka Honorarium ba la ïoh pdiang da ki MRW bad ki CBRW kam ïahap satia bad ka kam ba la tynrong ha ka tyrpeng jong ki. Kim lah ban pyndap wat ïa ka jingdonkam ba manla ka sngi. Namarba ym shah ba ngin trei ïa kiwei pat ki jait jam, namarkata, ngim don jingmih shuh naei naei ruh ban kyrshan ïa la ka iing ka sem bad ban im ïa ka jingim kaba palei. Haba ngi kheiñ ïa ka jingsiew ba la ïoh kum ka Honorarium kam kot wat tang ha u laiñ ka jingduk bad wat ha ka jingsiew bainong sngi,” la bynrap u kyrwoh.
“Haba peit na baroh ki bynta jong ka jingim jong ngi ngim hun satia namarba ym shym la pynkiew ïa ka jingsiew lane ban ai da kiwei pat ki lad kiba lah ban pyndap ïa ka jingkiew dor jong ki marbam mardih. Ka Union ka la shim ïa ka rai ban dawa ïa ka hok ban ïoh ïa ka jingsiew bapura kum ki nongtrei ba kham tbit namarba ngi ladep ïoh ïa ki jingshah hikai pyntbit ha ka CBID bad ngi la ïoh pdiang ruh ïa ki syrnot hapoh ka RCI hadien ba la pyndep ïa ka jingshah hikai pyntbit,” ong shuh shuh u kyrwoh.
“Ka Union kan ym shongthait, hynrei kan ïaid shakhmat ban dawa tad haduh ban siew ïa ka bainong katkum ka hok kaba ngi dei ban ïoh,” la pynkut u kyrwoh.
