Kenneth Nongsiej
Ka Riti Synshar jong ka ri India, kawei na ki kot riti synshar kaba jylliew tam ha ka pyrthei, ka pynpaw ïa ka jingkular jong ka ri ban pynbeit ïa ki jingdonkam bapher bapher jong ki nongshong shnong kiba bun jong ka. Napdeng ki kyndon kiba bun jong ka, ka don ka jingpynleit jingmut kyrpang ban ïada ïa ki jinglong bad ki hok ba kyrpang jong ki jaitbynriew bapher bapher jong ka thaiñ bad ki jaitbynriew. Kane ka jingpyrkhat ka paw bha khamtam ha ki jylla jong ka thaiñ Shatei Lam Mihngi, kiba don ki jaitbynriew bapher bapher kiba don ïa ki jinglong bapher bapher ha ka kolshor, ka imlang sahlang, ka ktien, bad ka saiñ hima sima. Ar tylli ki kyndon ba kongsan jong ka riti synshar kiba thmu ban pynneh pynsah ïa kine ki jinglong trai bad ka hok ka long ka Article 371A, kaba ïadei kyrpang bad ka Nagaland, bad ka Khyrnit Bahynriew (Sixth Schedule), kaba treikam ha ki jaka riewlum jong ka Assam, Meghalaya, Tripura, bad Mizoram. Kane ka jingpule ïanujor ka wad bniah ïa kine ki kyndon ban pynshai ïa ki jingktah jong ki bad ïa ka jingheh jong ka jingsynshar hi kaba ki ai sha kine ki thaiñ. Kane ka lynnong kan pynleit jingmut halor ka jingïatai ha ka jylla Meghalaya ha kaba ïadei bad ka bor jong ka Article 371A bad ka Khyrnit Bahynriew (Sixth Schedule) kban pynsngewthuh kane ba kham khlaiñ ha kaba ïada ïa ka jinglong kyrpang ka Jaitbynriew.
Ki kyndon ba kyrpang na ka bynta ka Nagaland: Ka Article 371A kaba la pynrung ha ka Riti Synshar jong ka Ri India lyngba ka jingpynkylla ba khatlai jong ka aiñ Riti Synshar (Constitution (Thirteenth Amendment)) Act jong ka snem 1962, ka kdew ïa ki jingdonkam ba kyrpang jong ka Nagaland bad ki briew jong ka. Ka ai ïa ka Ïing Dorbar Thaw Aiñ jong ka Nagaland ïa ka jingsynshar kyrpang halor ki bynta bapher bapher kiba kongsan, kynthup ïa ki jingleh niam ne imlang sahlang jong ki Naga, ka aiñ riti jong ki Naga, ka jingpynïaid ïa ka jingbishar paidbah bad kam runar kaba pynshong nongrim ha ka aiñ riti jong ki Naga, bad ka jinglong trai bad jingpynkylla ïa ka jaka bad ki marpoh khyndew jong ka. Lah ban pyntreikam ïa ki aiñ pdeng ha Nagaland tang da ka jingmynjur (resolution) jong ka Dorbar Thaw Aiñ. Kane ka jingpynbeit ka ai ïa ka jingsynshar hi kaba kongsan, kaba ailad ïa ka jylla ban synshar ïa kine ki jaka kiba donkam katkum ki riti ki dustur jong ka, kumta ka pynneh pynsah ïa ka pateng kolshor bad ki rukom treikam tynrai jong ka khlem ka jingpynthut kaba palat ïa ka pdeng.
Ka jingsynshar hi: Ka Khyrnit Bahynriew (Sixth Schedule) jong ka Riti Synshar ka Ri India ka ai ïa ka rukom treikam na ka bynta ka jingsynshar hi hapoh ki jaka riewlum ha Assam, Meghalaya, Tripura, bad Mizoram. La pdiang ha ka snem 1949 da ka Constituent Assembly, ka Khyrnit Kaba Hynriew ailad ban thaw ïa ki Autonomous District Council (ADC) kiba don ïa ka bor thaw aiñ, bor pynïaid, bad bor bishar ban pynïaid ïa ka synshar khadar ha ka thaiñ. Kine ki dorbar ki khmih ïa ki riti dustur ha ka imlang sahlang, ka jingthung ne jingbujli ïa ki Syiem ne ki rangbah, ka jinghiar pateng, ka jingshongkurim, bad ka jingïakhlad, bad kiwei kiwei ki kam jong ki ba ïadei ba ka Jaitbynriew. Hynrei ki ADC ki don hapoh ka jingpeit jong u Lat jong ka jylla, bad ka jing pynjlan ïa ki aiñ ka sorkar pdeng ka shong ha ka jingsngewthuh jong u President ka ri India. U President u lah ban pynmih ïa ki jingpynbna katkum ka Paragraph 12A(b) jong ka Khyrnit Bahynriew ban pyllait ïa ki katto katne ki aiñ ban treikam ha ki jaka riewlum.
Ka jing pynjlan ïa ki aiñ sorkar pdeng: Ka Mines and Minerals (Development and Regulation) Act kam treikam ha Nagaland namar ki kyndon ba kyrpang kiba ïada ïa ki jaka bad ki marpoh khyndew jong ki Naga. Hynrei kane ka aiñ ka treikam ha ki bynta jong ka Khyrnit Bahynriew (Sixth Schedule) jong ka jylla Meghalaya, ha kaba ka Sorkar Jylla ne ki ADC kim don bor ban pyllait ïa ka jylla na kane ka aiñ ka Sorkar Pdeng. Ki rukom tih maw kat kum ka jing tih tynrai kim shah ïada da ki aiñ sorkar jylla lane ka District Council. Shuh shuh, ka Bharatiya Nagarik Suraksha Sanhita (BNSS), kaba dei ka aiñ pyntrei kam runar kaba thymmai, ka treikam ha Nagaland wat hapdeng ka jingpyllait jong ka. Ka Article 371A ka ailad ïa ka Ïing Dorbar Thaw Aiñ aiñ ban ai jingmynjur ban pyntreikam ïa ki aiñ ka sorkar pdeng, katba ha ka Khyrnit Bahynriew jong ka jylla Meghalaya ïa ka BNSS la bud tang ha ka mynsiem, bad ka sorkar lada kwah ka lah ban pynjlan ïa ka lyngba ka jingpyntip (notification). Ki mukotduma ki shah bishar ha ka iingbishar jong ka District Council lada baroh arngut u/ka nongshah lehbein bad u/ka nongshah kynnoh ki dei na ki jaitbynriew riewlum (tribal).
Ka Rukom Pynkylla (Amendment Procedure): Ka rukom pynkylla (amendment procedure) ïa ka Article 371A bad ïa ka Khyrnit Bahynriew (Sixth Schedule) ka long kumjuh. Baroh ar ki dawa ïa ka jingbun paid kaba kyrpang katkum ka Article 368 jong ka Riti Synshar jong ka Ri India. Ïa ki jingpynkylla dei ban mynjur da baroh ar tylli ki iing dorbar Parliament ryngkat bad ka jingbun paid na ka jingdon baroh jong kawei pa kawei ka iing, bad ym duna ïa ka ar bynta na ka lai bynta ki dkhot kiba don bad thep vote. Mynta, ban pynkylla ne weng noh ïa kine ki kyndon kan long kaba eh namar ka jinglong jong ka sorkar NDA. Hynrei lada ka sorkar ka la ïoh 400 tylli ki shuki ha Parliament bad ka jingbun paid ha Rajya Sabha, kum kine ki jingpynkylla ki lah ban long.
Ki jingïapher ba kongsan: Ka jingïapher kaba kongsan hapdeng ka Article 371A bad ka Khyrnit Bahynriew ka long ka kyrdan jong ka jingsynshar hi kaba ki ai. Ka Article 371A ka ai ïa ka Nagaland ïa ka jinglaitluid kaba khraw, khamtam eh ha kaba pynneh ïa ka jinglong Naga bad ki riti dustur. Ka Dorbar Thawaiñ jong ka Nagaland ka don ka bor kaba khraw ha kaba rai ïa ka pynjlan ïa ki aiñ pdeng, kaba ailad ïa ka jingsynshar hi bad ka jingpynneh pynsah ïa ka kolshor.
Pynban, ka Khyrnit Bahynriew ka buh ïa ka rukom synshar lyngba ki ADC. Katba kine ki Council ki don ïa ki bor ba kongsan ha ka thaiñ, ki hap hapoh ka jingpeit bniah na ka sorkar jylla bad ka sorkar pdeng. Ki ADC ki lah ban thaw aiñ halor ki katto katne ki kam jong ka thaiñ, hynrei ka bor ban rai ïa ka jing pynjlan ïa ki aiñ Sorkar Pdeng ka shong ha u President jong ka ri India, kaba pynpaw ïa ka rukom synshar laitluid kaba kham pynbeit haba ïanujor bad ka Article 371 A.
Ka jingpynkut: Baroh ar ka Article 371A bad ka Khyrnit Bahynriew (Sixth Schedule) ki dei ki lad treikam ba kongsan jong ka riti synshar ba la shna khnang ban ïada bad kyntiew ïa ki jingmyntoi jong ki jaitbynriew riewlum trai ri ha ki thaiñ Shatei Lam Mihngi jong ka ri India. Ka kyndon 371A ka ai ïa ka Nagaland ïa ka jingsynshar kaba kongsan ban pynneh ïa ka kolshor bad ka imlang sahlang kaba kyrpang jong ka da kaba duna eh ka jing tuklar jong ka pdeng. Pynban, ka Khyrnit Bahynriew ka ai ïa ka rukom treikam kaba la buh ryntih na ka bynta ka jingsynshar lyngba ki ADC. Kane ka jingïanujor ka pynpaw ïa ki rukom treikam bapher bapher ba la shim da ka Riti Synshar jong ka ri India ban pynbeit ïa ki jingdonkam bapher bapher jong ki jaitbynriew riewlum jong ka, kaba pynthikna ba baroh ar ki jinglong ba kyrpang jong ka Nagaland bad ki jaka riewlum.
Haba kheiñ ïa ka bor jong ka Article 371A ka ba la ai ka hok ban rai la dei ban pyntreikam ne em ïa ki aiñ ka Sorkar Pdeng, ngim lah ban kyntait ba ka long ka ba khlaiñ hynrei ka lah ban long kaba eh ïa ka jylla Meghalaya ban ïoh ïa ki kyndon kiba kum kine, khamtam haba ka Sorkar Pdeng kam treh ban pyntreikam ïa ka Inner Line Permit (ILP). Ka lynti ban ïaid shakhmat ka lah ban kynthup ïa ka jingpynkhlaiñ ïa ki ADC bad ban pyndonkam ïa ka jinglah jong ki. Ki dkhot ba la jied jong ki ADC, kiba la nang la stad bha bad kiba sngewthuh ïa ki riti ki dustur, ki dei ban trei ban pynkylla ïa ki rukom treikam jong ki aiñ riti kiba kham bun sha ki aiñ ba la thoh.
