Shillong, Ïaïong, 30: Ka Congress kaba shong ha ka Liang Pyrshah ha ka sngi Balang ka la kynnoh ïa ka Sorkar MDA ba la ïalam da ka National Peoples Party (NPP) da kaba ong ba ka jyrsieh bamsap ka dei kaba la sdang na ka Chief Minister’s Office (CMO).
Ha ka jingïakren bad ki lad pathai khubor, u Joint Secretary jong ka AICC u Anthony Mathew u la ong ba ka political executive meeting jong ka MPCC kaba la long ha kane ka sngi ka la ïakren sani ruh halor ka jyrsieh bamsap ba la kynnoh pyrshah ïa ka Sorkar ba la ïalam da ka NPP.
“”…ha kaba baroh bad kano kano ka long ban die, kaba ktah pat ïa ka jingim ba manla ka sngi, ki jingeh, ki jingkit bakhia jong ki paidbah ka Meghalaya kaba sdang na ka um sha kiwei kiwei pat ki jyrsieh bamsap. Phi ktah ïa kano kano ka mar, ka dei ka jingleh thok,”u la pynpaw.
“Baroh kiei kiei ki ïaid lait na ka jingpynïaid bad u Myntri Rangbah um lah ban tehlakam halor ka synshar ka khadar jong u namarba la ïalam ïa ka jingbamsap na ka ophis jong u Myntri Rangbah bad kumta ym lah satia ban weng ïa ka jyrsieh bamsap naduh ka kyrdan kaba napoh, kaba long ka jingsngewkhia kaba la pynpaw da ki nongtrei jong ka Congress ha ka por ba ngi la pynlong ïa ka political executive committee,” la kynnoh shuh shuh u Mathew.
Ha kaba ïadei bad kane, u nongïalam jong ka AICC u la pyntip ba ka Congress ka la rai ban bishar bniah ïa kine ki mat na ka bynta ka bha ka miat jong ki paidbah nongshong shnong jong ka jylla Meghalaya.
