Shillong, Nailur 26: Ka Ophis jong ka District Medical & Health Officer, East Khasi Hills, Shillong, ha ka sngi Thohdieng ka la pynlong ïa ka prokram ba kyrpang hapoh ka Swasth Nari, Sashakt Parivar Abhiyaan (SNSPA) ha Smit PHC kum shi bynta ka campaign ha baroh kawei ka ri kaba la rakhe naduh ka 17 tarik Nailur haduh ka 2 tarik Risaw 2025.
Ha kane ka jingïalang la sakhi ïa ka jingïashim bynta shitrhem ki nongshong shnong, ki khynnah skul, ki nongtrei ka koit ka khiah, bad ki nongmihkhmat jong ki kynhun ha ki shnong. La pyni ïa ki poster, ki tiar IEC, bad ki khubor ba ïadei bad ka koit ka khiah ban pynphriang jingtip shaphang ki mat kiba kongsan kum ka jingbam kaba tei, ka jingpynduh ïa ka TB, bad ki jingpang bym ïabit.
Ïa kane ka prokram la plie paidbah da u Dr. Ricky A J Syngkon, MP Shillong (ST) Konstitwensi kum u Kongsan. U Bah Ardent B Basaiawmoit, MLA ka Nongkrem Konstitwensi u la ïadonlang kum u Symbud Kongsan, katba u Bah Kitbor Syiem, MDC ka Nongkrem Konstitwensi u la long u Nongshah khot kyrpang.
Haba ai jingkren ha ka jingïalang plie paidbah, u Dr. Ricky A J Syngkon u la ong, “Ka koit ka khiah jong ki longkmie ka long kaba kongsan na ka bynta ka bha ka miat jong man la ka longïing. Ka kmie kaba koit ba khiah ka mut ki khun kiba koit ba khiah bad ka imlang sahlang kaba khlaiñ. Lyngba kane ka campaign, ka sorkar ka ïaleh ban lap kloi bad ban ai jingsumar ha ka por kaba biang khnang ba ki longïing kin ym jynjar namar ka jingtieng ne ka jingpynslem. Ka koit ka khiah ka dei ka spah, bad ka jingkoit jingkhiah kadei ka nongrim na ka bynta ka ïoh ka kot bad ka lawei kaba bha.”
Ha ka jingai jingkren jong u, u Bah Ardent Basaiawmoit u la ban jur, “Ka koit ka khiah na ka bynta baroh ka dei ka thong jong ngi naduh mynshwa, hynrei ka sdang na ka jingkitkhlieh shimet shimet. Ngim dei ban tieng ban tip ïa ka jinglong ka koit ka khiah jong ngi, ka jinglap kloi ka ïada ïa ka jingim. Nga pynshlur ruh ïa ki samla jong ngi ban ïashim bynta shitrhem ha ka jingai snam, kaba long ka jingshakri kaba bha ïa ka imlang sahlang.”
Shwa kane, u Dr. A J U Kharkud, District Medical & Health Officer, bad u Dr. C. Iangrai, Joint Director of Health Services (MCH&FW), ki la kren shaphang ki jingthmu jong ka Abhiyaan, da kaba ban jur ïa ka bynta jong ka ban pynkhlaiñ ïa ka jingai jingtip ïa ki paidbah shaphang ka koit ka khiah lyngba ki medical camp, ki jingai snam, bad ki prokram ai jingtip.
La sam ruh ïa ki khusnam sha ki nongjop ha ki jingïakob Baby Show bad Baby Shower. Ka nongïoh jingmyntoi, ka kong Deiphibakor Kharbudon na Kynton-U-Mon, ka la pynpaw ka jingsngewnguh, da kaba ïasam ba ma ka bad i khunlung jong ka ki la ïoh jingmyntoi na ka jingai tika ha ka por kaba biang bad ba ka la tip shaphang kane ka campaign lyngba ki sienjam jong ki nongtrei ASHA. Ka la ai khublei ïa ka Sorkar na ka bynta kane ka sienjam.
La pynsdang ïa ka prokram da u Dr. E L Kharmutee, District MCH Officer, bad la sdang da ka jingkren ai khublei na u Dr. R Kharmih, Medical & Health Officer ka Smit PHC. La pynkut ïa kane ka prokram da ka jingai khublei na u Bah Pyngshongdor Lyngdoh Nongbri u Sordar ka Smit Pyllun, bud sa ka Medical Camp, ka jing ai snam, bad ki kam pynshai paidbah halor ka koit ka khiah.
