Shillong, Lber, 12: Ka Myntri jong ka Sorkar Jylla kaba khmih ïa ka tnat Law ka Dr. Ampareen Lyngdoh ha ka sngi Balang ka la ong ba u Justice (Retired) BP Katakey uba khlieh ïa ka komiti ba tang marwei ka dei kaba la thung da ka Iingbishar Meghalaya High Court bad kam hap satia hapoh ka jylli jong ka Sorkar ban ïakren ïa kane ka kam namarba ka long ka jingkheiñ dewthala hakhmat ka Iingbishar.
“U nongbishar uba khlieh ïa ka komiti u dei uba la thung hi da ka Iingbishar Meghalaya High Court bad um hap hapoh ka jylli treikam jong nga lymne hapoh ka jylli treikam jong ka Sorkar ban ïakren ïa kane ka kam namarba ka long ka jingkheiñ dewthala,” la ong ka Dr. Ampareen haba jubab ïa ka Cut Motion ba la wanrah da u nongïalam ka Voice of the People Party u Bah Ardent Basaïawmoit ha Iingdorbar Thawaiñ.
Haba kdew katkum ka kaiphod na ki lad pathai khubor, u Bah Basaïawmoit u la kynnoh ba ka Sorkar ka la pynpaw ïa ka jingthmu ban pynkut noh ïa ka jingshakri jong u Justice BP Katakey, uba khlieh ïa ka komiti kaba ba la thung da ka Iingbishar ban tohkit ïa ka jingtih dewïong beaiñ ha ka jylla.
“Kumba la paw ha ki lad pathai khubor, ka sorkar mynta ka dang pan jingmut na ka liang ka aiñ shwa ban ujor ha ka ïingbishar ban pynkut noh ïa ka jingshakri jong u. Ka long kumba ka jingkut jingmut jong u nongbishar ban sei madan ïa ka jingtih dewïong khlem jingbit ka dei ka dawbah ba ki briew kiba don ha ka bor bad ki kynhun khaii dewïong ha ka jylla ki sngewsih bha,” u la ong.
U la bynrap ba ka khubor ka ïathuh naduh ba la thung ïa u Justice Katakey ha u Ïaiong, 2022, u la dep aiti palat ar dorjon ki kaipho ba shipor kaba pynthikna ïa ka jingtih bad shalan dewiong beaiñ kaba dang ïai bteng ha kiba bun ki bynta jong ka Jylla.
Shuh shuh u Bah Basaïawmoit u la kynnoh ba kane kam dei satia ka sien banyngkong ba kum kane ka jingtuklar kan jia ha ka jylla Meghalaya hynrei ka la jia ruh kham mynshwa ha kaba ïa ki ophisar jong ka Lokayukta la shu pynsangeh ïa ka jingtreikam tang halor ki nongrim bym shongnia tang namarba ki la pyndep hok ïa la ka jong ka kamram.
“La shu pynngeit ïa ngi ba ki jinglap jong u Justice Katakey ki lah ban pynpaw pyrthei ïa ka jingïatreilang hapdeng ka Sorkar kaba don ha ka bor bad ki kynhun shalan dewïong beaiñ ha ka jylla. Kumta kaba bha tam ka long ban weng noh ïa u Justice Katakey,” u la ong.
“Kumta ngi kwah ban pynpaw ha kane ka Iingdorbar ba kum ka party ngi pyrshah ïa kane ka jingleh bad ïa jingthmu jong ka Sorkar bad ngin kyntu jur ïa ka Sorkar ba kam dei ban tuklar ïa ka jingtreikam jong u bad lehse ban ailad ïa u ban pyndep ïa ki kamram bad ki jingkitkhlieh ba la bynshet ha u katkum ka komiti ba la thung da ka Iingbishar High Court,” la bynrap u shuh shuh u MLA ka Nongkrem.
