Shillong, K’lyngkot, 04: Ki dkhot ka Khasi Students Union (KSU) East Jaiñtia Hills District Unit lyngba ka Culutural Cell ryngkat bad ki dkhot ka KSU Shnongrim Unit ha ka sngi Baar ki la leit iuh kjat ha ka krem Kut Sutiang bad ha ka krem Khmat Wah Tisha kaba don ha ka shnong Shnongrim kaba hap hapoh ka Elaka Nongkhlieh.
Ka khana ka ong ba ka krem Kut Sutiang ka dei ka krem ba rieh tngen u Woh Kiang Nangbah bad ki shipai jong u ha ka por ba u la khun ïa ka thma pyrshah ïa ki Phareng ha ki snem 1862-1863.
Ka jingthmu jong ka seng ban leit khnang sha kane ka jaka ka long ban pynsah nam ïa kine ki krem ba pawnam khnang ba ki longdien kin tip ïa ka pakit ki mynnor jong ki por ba la leit noh..
Ha u kyrwoh ba la phah sha ki lad pathai khubor, ka seng ka la pynpaw ba la donkam eh ban pynneh pynsah ïa ki matti ne ki jaka donnam kiba u Blei Kynrad Nongbuh Nongthaw uba ai sngewbha ha ka mariang.
Hapoh ka krem Kut Sutiang la lap ïa ki siang jyntah kiba la rim bha bad ïa ki maw kiba ïa syriem kum ki shuki ha kaba la ïathuh ba u Woh Kiang Nangbah bad ki nongïalam ki ju shong jingïalang.
Ka KSU ka kyntu ïa ka sorkar ban phah sor jamin ïa kine ki krem kiba don ïa ka histori khamtam ban pynlong ïa ki ki jaka jngoh kai pyrthei ha kaba ki briew shityllup ka pyrthei kin tip bad ki briew na kitei ki thaiñ kin im kamai jakpoh na ka kam jngohkai pyrthei.
Ka seng ka la pyntip ba kan sa aiti da ka jingthoh sha ki bor ba dei peit bad ruh ban wad ïa ki lad jingïarap ban pyn pawnam ïa kine ki krem bad kiwei kiwei kiba don hapoh ka district.
