Shillong, Rymphang, 18: Ka Khasi Students Union (KSU) ha ka sngi Baar ka la pynskhem ba ka dang ïai pyrshah ïa ka jingpyrshang jong ka Sorkar Pdeng ban wanrah ïa ka lynti Rel sha rilum Khasi bad Jaiñtia.
U President ka KSU samla Lambokstarwell Marngar u la ong ba ka Sorkar Pdeng bad ka NFR ki ïai bteng ban pynshrai da kaba trei borbah ban wanrah ïa ka lynti Rel wat hapdeng ka jingpyrshah na ki babun balang.
U la ong ba ka KSU ka kloi ban shim da kano kano ka sienjam kaba kham tyngeh ban pyrshah ïa ka jingpyrshang lada ka Sorkar Pdeng ka dang ïai leh mynthi bad pyrshang ban shu wanrah jubor ïa ka lynti Rel ha kane ka bynta jong ka jylla.
U samla Marngar u la kyrpad ïa ki shnat treikam jong ka seng kiba don sha rilum Khasi bad Jaiñtia ban long kiba la khreh lada donkam ban mih shakhmat ban pyrshah ïa kane ka jingthmu.
“Ka long shisha kaba sngewsih ba ka Sorkar Pdeng kam shimkhia wat haba ngi la pynpaw da kaba shai ïa ka nongrim kaba ngi ieng,” ong u President ka KSU.
U la ong shuh shuh ba kin ym ailad lada ka NFR ka thmu ban pynlong ïa ka jingsorjamin ban wad lynti thymmai na ka bynta ka lynti Rel ha rilum Jaiñtia.
U samla Marngar u la ong ha u snem 2017 ka KSU ka la pyrshah ïa ka jingtyrwa ban wanrah ïa ka projek lynti rel ha Ronghana, Byrnihat bad kan dang ïai bteng ban leh kumjuh lada ka Sorkar Pdeng bad ka Sorkar Jylla ki leh da ka bor ha Meghalaya.
Lah ban kdew hangne, ha u bnai Jymmang, 2017, ka KSU ka jingpyrshah jong ka KSU ïa ka lynti rel ka la mih pynban ka huri hura, kaba lam shaduh u pud ba ki dkhot ka KSU kin ïatakhuh bad ki bor Pulit.
Hadien ki jingshah pynjulor ki tiar ki tiar, u kontrator u pyntrei ïa ka lynti rel Tetelia–Byrnihat Line u la hap ban phet krad.
Ka KSU ka la pynmih biang ïa kane ka jingpyrshah hadien ba ka la don ka khubor ba ka NFR mynta ka la sdang ban wad lynti thymmai ban pynïasoh ïa ka sor Jowai da ka lynti rel na Chaparmukh, Nagaon District ka jylla Assam.
Katkum ka kaiphod, ïa ka lynti rel kaba jrong 180-kilometre yn pynïasoh na Chaparmukh Junction ha Assam sha sor Jowai ha Meghalaya kaba la kynthup da ka NFR ha ka jingsorjamin ban shna ïa ki lyntri rel ha ka thaiñ Shatei Lammihngi.
Kane ka lynti rel ba la tyrwa ban shna thymmai kan pynïasoh ïa kiba bun jaka kum ka Bhoksong, Rajagaon, Baithalangso, Jengkha, Kherani, bad Umrangso shwa ban poi sha Jowai, ong ka kaiphod bad bynrap, ba kane ka lynti rel kan weng ruh ïa ki jingeh ba ïadei bad ka jingjngai ha ka leit ka wan bad ban pynïajan shuh shuh ïa ka jingpynïasoh hapdeng ka Assam bad ka Meghalaya.
