Shillong, Jymmang, 10: Na ka jingïaleit bam khana sngewtynnad shi paralok ka la mih ka jingïakren ban ym pynlut kai ïa ka por ha ki kam sngewbha hynrei ban phaikhmat lem sha ki longiing ki baduk ba rangli kiba donkam ïa ka jingïarap lem na ki parabriew kiba don ïa ka mon babha.
Kane ka kynhun kaba don tang 7 ngut shi paralok, ha kaba sdang, ki la suit la shor ïa ka shlem treikam jong ki da ka kyrteng Pathfinder ha u snem 2016 mynta ka jingdon jong ki dkhot kiba don ïa kajuh ka jingthmu ka la kynjoh sha ka 24 ngut eiei.
Naduh ba la seng ïa ka Path Finders shibun ki kam ka la lah ban leh ha kaba kner ïa la ki jong ki kti ban noh synniang sha ki rangli ki juki la ha ka dei ha ka bam ka dih, ki jaiñ ki nep bad wat ha kaba pynshna ruh ïa ka ïing ka sem ïa ki longing kiba duk khnang ban lait ka sngi, u slap bad ka lyer.
Ka jingdon jong kane ka kynhun ka la long shisha ka jingkyrkhu ïa kiba bun ki longïing ha kylleng ka ri Khasi kiba la mad ïa ki jingeh, ki jingjynjar ha ka ïoh ka kot, ha ka thiah ka dem bad ka shong ka sah.
Shuh shuh kane ka kynhun, mynta ka kynti, ka don ïa ka jingthmu ban pynkhreh ïa ka jingdap 10 snem ka jong ka ha ka jingïaid lynti ban shakri ïa ki parabriew.
