Ka Tnat Bar-ri jong ka China ka la pynmih ïa ka khubor ha ka 12 tarik u Jymmang, ba yn phah ïa ka Kynhun Kyrpang (special envoy) sha Ukraine bad Russia ha ka taïew ban wan kum shibynta na ka jingpyrshang jongka ban wanrah ïa ka jingïasuk ïabeit bad ban pynkut noh ïa ka thma hapdeng kine ki ar tylli ki ri.
U nongaiktien jong ka Tnat Bar-ri, u Wang Wenbin u la ïathuh ba u Li Hui, uba dei u nongmihkhmat ba kyrpang jong ka China u ba khmih ïa ki kam kiba ïadei bad ki ri Europe (Eurasian affairs), u ba long teng mynshwa kum u Nongkit ‘tiensyiem (Ambassador) sha Moscow, un leit ïuh kjat ruh sha Poland, France bad Germany ha kaba ïadei bad kane ka kam.
Ka China ka la ong ba ka ïengpdeng ha kaba ïadei bad ka jinghiarthma jong ka Russia ïa ka Ukraine, hynrei ka la pynbna bad kubur ba ka jingïadei hapdeng jong ka bad ka Russia kam don pud (”no limits”), ha kajuh ka por ka la kynnoh ba dei ka America (U.S.) bad ka Kynhun ki Ri Europe (NATO) kiba pynshit bad pynmih ïa kane ka jingïakyn-ad. Ka China ka la pynkhreh ïa ki kyndon soskular jingsuk na ka bynta ka Ukraine ïa kiba la kyntait mardor da ki traishnong, ki ba dawa ba ka jingïakut ban ïasuk kan wan tang lada ka Russia ka pynsangeh shisyndon ïa ki jingkyntur jongka bad kan weng noh ïa ki kynhun shipai jongka na u pud u sam jong ka Ukraine.
Ha u bnai ba lah dep u Myntri Rangbahduh ka China, u Xi Jinping u la ïakren da ka phone bad u President ka Ukraine, u Volodymyr Zelenskyy, kum ka jingsdang ban ïa pynbeit da ka jingsuk.
“Ka jingleit ïuhkjat jong u Nongmihkmat ka China ïa ki ri kiba don ka jingïadei bad ka jingïakyn-ad ka pyni shai kdar ba ka China ka kutjingmut ban wanrah ïa ka jingsuk bad jingkren da ka lynti ba dei,” la ong u Wang ha ka jingpyllait khubor jongu ha ka 12 tarik u Jymmang.
“Ka China ka angnud ban ïada naka jingjur ka jingïakyn-ad,” laong u Wang.
Ka jingleit ïuhkjat jong u Li ïa ki ri Europe kan sdang ha ka taïew ban wan tangba ym pat pyllait ïa ki jingtip ba bniah ha kaba ïadei bad kane ka kam.
Mynshwa ka China ka ju kiar ban tuklar haba don kino kino ki jingïakyn-ad hapdeng ki ri ka pyrthei, hynrei mynta la ïohi ba ka pyrshang ban paw pyrthei kum kawei na ki ri Khlaiñbor hadien da ka jingtuklar jongka ban pynïasuk ïa ka Saudi Arabia bad ka Iran ha u bnai Lber ba dang shu dep, kaba la wanrah biang ïa ka jingïadei hapdeng kine ki ar tylli ki ri kaba la dkut naduh hynñiew snem kynthih. Ka China ka long paralok bha bad ka Moscow kumjuh ruh ka myntoi bha ha ka ïoh ka kot namar ka la kylla long ka nongthied ba radbah ïa ka umphniang bad ka gas hadien ba ka United States bad ki paralok jongka ki la sangeh ban thied naka Russia.
Ka Beijing ka ñiew ïa ka Moscow kum ka paralok ha kaban ïengpyrshah ïa ka jingtuklar donbor jong ka U.S. ïa kiwei kiwei ki ri ha ka pyrthei. Ha kajuh ka por ruh kam treh ban pynrem ïa ka jinghiarthma jong ka Russia ïa ka Ukraine, ka da pyndonkam ïa ka iktiar jongka kum kawei na ki Ri ba long dkhot shijunom jong ka U.N. Security Council ban pynkiar na kino kino ki jingkynthoh lane jingpynshitom ïa ka Russia.
U Wang u la kubur ruh ba u nongmihkhmat jong ka Communist Party, u Wang Yi bad u Nongaibuit ïada Ri jong ka U.S.(National Security Adviser), u Jake Sullivan ki la ïa kynduh ban ïakren syllok ha ka 10 bad 11 tarik u Jymmang ha Vienna, Austria. U Wang u la ong ba kine ki arliang mamla ki la ïoh “ban ïasyllok khuid mynsiem, sani bha, kiba don jingmyntoi bad ba pynkhlaiñ” ïa ka jingïadei ba neh bad ba khambha hapdeng ka China bad ka America.
Ka jingïadei hapdeng ka China bad ka U.S. ka la blad bha ha u bnai Rymphang hadien baka America ka siat pynhab ïa ka Pla Lyer Khluit (balloon) ba la suba kum ka jingsyntiat tuh jong ka China da kaba her lyngba ka suiñbneng jongka Canada bad ka United States. Namar kane ka jingjia la pynsngeh ïa ka jingleit jngoh ïa ka Beijing da u U.S. Secretary of State, u Antony Blinken ïa kaba ym pat pynbeit shuh haduh mynta.
