Shillong, Nailur, 17: Ka Congress ka la kynthoh tyngeh ïa ka Sorkar Meghalaya Democratic Alliance (MDA) ba la ïalam da ka National People’s Party (NPP) da kaba kynnoh ba kam shym la “khein snep’ ïa ki kynthei bad ka jingmihkhmat jong ki ritpaid ha ka jingsynshar.
Kane ka la jia hadien shisngi ba u Myntri Rangbah ka jylla u Conrad K. Sangma u la bujli ïa ka shuki Myntri da kaba pynrung thymmai ïa ki phra ngut ki Myntri. Hynrei kane ka Kynhun Myntri kaba mynta kam don ïa ki nongmihkhmat jong ki kynthei hadien ba la pynhap noh ïa ka MLA jong ka East Shillong ka Dr. Ampareen Lyngdoh.
Ha ka jingïakren bad ki lad pathai khubor, ka President jong ka Meghalaya Pradesh Mahila Congress (MPMC) ka Kong Joplyn Shylla ka la pynpaw ïa ka jingbynniaw halor ka jingbym lah jong ka Sorkar ban thung ïa ki kynthei kum ki Myntri, watla ka don ïa ki nongïalam kiba tbit hapoh ka kynhun synrop kaba bat ïa u lakam synshar.
Ka Kong Shylla ka la pynpaw ba ka rai jong ka sorkar ka dei ka jingshet kylla ïa ka imlang sahlang kaba aijait sha ki kynthei bad kaba kheiñkor haduh katta katta ïa ki kynthei.
“Ka dei ka jingshetkylla ïa ka nongrim jong ka imlang sahlang jong ngi kaba aijait kmie, ha kaba la ju burom ïa ki kynthei ha ka rukom kaba khraw tam,” la ong ka Kong Shylla.
Ka President jong ka MPMC ka la kdew ba ka jingbym don ki kynthei ha ka kynhun myntri ka dei ka jingleh bymhok kaba pawshai tyngkreiñ haba khein ïa ka jingdon jong ki kynthei kiba ïashim bynta ha ka kam nongmihkmat ha ka jylla.
“Ha ka Jylla kaba ka jingïashim bynta jong ki kynthei ha ka kam jied nongmihkhmat ka kham bun ban ïa ki shynrang, ka jingbym don jong ki kynthei ha ka Kynhun Myntri ka dei ka jingleh bymhok kaba paw bad ka jingkyntait ïa ka jingïashim bynta kaba hok,” la bynrap shuh shuh ka Kong Shylla.
Ka la kynnoh ruh ba ka Sorkar ba la ïalam da ka NPP-BJP ka la kyndat sharud ïa ka sur jong ki kynthei bad leh bym suidniew ïa ka akor bad ka riti ka dustur jong ka jylla.
“Ha ka jaka ban pynkupbor ïa ki kynthei, ka Sorkar NPP-BJP ka la jied ban kyntait ïa ki sur jong ki kynthei bad ban iehnoh ïa ka akor bad ka riti dustur jong ka imlang sahlang jong ngi,” ong shuh shuh ka Kong Shylla.
U Secretary ka MPCC u Bah Manuel Badwar u la kynnoh ba ka Kynhun Myntri mynta ka la kylla long kum ka ‘”family politics” bad ka “family cartel.”
U la ong ba kam shym la mihkhmat satia ïa ki paidbah hynrei ka paw kumba ka dei ka jingïohnong shimet.
U Bah Badwar u la ban jur ïa ka jingdonkam ban ïoh ïa ka jingmihkhmat na ki kynthei bad ki kynhun ritpaid ha ka Kynhun Myntri, khamtam ha ka jylla kum ka Meghalaya.
“Ka long kaba kongsan ban ïohi ban don katto katne ka jingmihkhmat na ki kynthei, khamtam ruh ïa ki ritpaid,” u la ong.
“Ki kynthei ki hap ban don ka bynta kaba kongsan bha, khamtam ha kaba ïakhun ïa ki mat kum ki kam runar bad ka aiñ bad ka shongsuk shongsaiñ,” u la bynrap.
U Bah Badwar u la pynpaw ïa ka jinglong jingman jong ka aiñ bad ka suk ka saiñ ha ka jylla ka la nang sniew, da kaba kdew ïa ki jingjia ba dang shen halor ki kam runar pyrshah ïa ki khynnah rit.
“Tang ki kynthei kiba lah ban sngewthuh kham bha ïa ki khynnah,” u la ong. “Ka jingdon ïa ki ha ki nongrim jong ka bor kan long kaba kongsan bha.”
U Secretary jong ka MPCC u la kynthoh ruh ïa ka jinglong jong ka Kynhun Myntri, da kaba ong ba ka la kylla long ka “kynhun nongkhaii.”
