Shillong, Nailar 12: U nongialam jong ka Liang Pyrshah ka Iingdorbar Thawaiñ ka Khasi Hills Autonomous District Council (KHADC) u Bah Titostarwell Chyne ha ka sngi Saitjaiñ u la pynpaw ia ka jingsngewsih halor ka jingbym kren pyrshah jong ka Sorkar Jylla ia ka kyntien ‘Village Council’ ba la pynrung ha ka jingpynbeit thymmai ia ka Khyrnit Bahynriew jong ka riti synshar ka ri India ha ka jingiakynduh ba dang shen ia u Myntri Rangbahduh ka ri u Narendra Modi ha New Delhi.
Ha ka jingiakren bad ki lad pathai khubor u Bah Titos u la ong, “ha ka por ba la wan ka komiti ngi la pynpaw ka jingpyrshah ia ka jingpyndonkam ia ka kyntien, ‘Unrepresented Tribe’. Baroh ki kynhun ki pyrshah bad nga iohi ruh dang shen u Myntri Rangbah ka Jylla bad ka kynhun Myntri ruh ki la iakynduh ia u Myntri Rangbahduh ka ri India da kaba pynpaw ba ka Sorkar Jylla ruh ka pyrshah ia kane ka kyntien ‘Unrepresented Tribe’ bad nga la iohi ruh ba ka la don ka jingdawa ban kyntiew ia ki Seat ha ki lai tylli ki Autonomous Distirct Council (ADC).”
“Hynrei nga don tang kawei, nga lyngnoh ba ka Sorkar Jylla kam shym la pynpaw ha ka jingiadei bad ka kyntien ‘Village Council’. Kane ka kyntien ka dei kaba ma ngi ki MDC jong ka Khasi Hills Autonomous Distirct Council (KHADC) ngim hun satia ia kane namarba ka jingpynrung ia ka kyntien ‘Village Council’ kan pynduh noh ia ka jingtreikam jong ki Dorbar Shnong, kaba mut lada ngi don ia ki Village Council, ngin hap ban ialeh da ka elekshon bad ki riti ki dustur jong ngi ruh kin kylla lut hangta,’ u la ong.
“Na ka liang jong ka Council ha ka por ba nga dang long u Chief Executive Member (CEM) nga la wanrah ia kawei ka aiñ ia kaba la tip kum ka Village Development Council (VDC) Act, bad ka jingthmu haba wanrah ia kane ka aiñ ka long kan urlong ka jingkwah jong ka Sorkar Pdeng ba ka don ka jingsynshar ha ki shnong ki thaw. Ka jingthmu jong ka Sorkar India ban wanrah ia ka Village Council ka long ba ki kwah ban don ka jingsynshar ha ki shnong ki thaw ha kaba ki skhim baroh kiba wan na ka Sorkar kin wan lyngba ki shnong ki thaw. Ha kajuh ka por, ki (Sorkar Pdeng) kwah ba kan don ka elekshon jied Rangbah Shnong bad ia ki Executive Member jong ki Village Council bad ki kwah ruh ba kan don ka jingmang bhah kyrpang na ka bynta ki kynthei,” la ong shuh shuh u Bah Titos.
Da kaba pynpaw ba ka riti dustur kam pat shah ia ki kynthei ban don bynta ha ki dorbar shnong, u Bah Titos u la ong, “phi iohi ba ki kynthei ki kwah ban don bynta ha ki komiti jong ki dorbar shnong hynrei ka riti ka dustur kam shah ba ki longkmie kin long dkhot ha ki Dorbar Shnong. Mynta kane ka dang dei tang ka jingiatai bad ngim pat lah ban ong ia kane bad ka riti ka dustur hi ka long ba ki kynthei kim lah ban iadon bynta ha ka dorbar shnong”.
Haba kylli, u Bah Titos u la ong, ka District Council ka la buh ia ka kyndon ba ki kynthei ki lah ban long ki dkhot jong ki Village Development Council (VDC). Ngi kwah ba ka Sorkar Jylla ka dei ban kyntu ia ka Sorkar Pdeng ba ha ka jaka ban buh ia ki Village Council dei ban don da ki Village Development Council.
