Shillong, Jymmang, 15: Kan long ka khubor kaba sngewtynnat ïa ki khynnah skul kiba dang shu pas ïa ka eksamin matrik mynta u snem 2025 hadien ba ka skulbah Martin Luther Christian Universty ka la pynbna ban pynsdang noh ïa ka jingpule ba la tip kum ka Integrated Five Year Programe.
Ha ka jingïakren bad ki lad pathai khubor u Registrar jong ka skulbah u Dr. Ïadonlang Tynsong ryngkat ka jingsynran lang jong ka Pro Vice Chancellor ka Dr. Larilyn Kharpuri bad kiwei kiwei, u la pyntip ba kane ka jingpule ïa ka Integrated Five Year Programe kan long 2 snem ha ka Diploma bad 3 snem ha ka Bachelor Programe.
U Dr. Ïadonlang Tynsong u la pyntip ruh ka jingsiew na ka bynta ka bai pule kan long kaba kham tad ha kaba ki khynnah kiba wan na ka longiing kaba kham duna ha ka ioh ka kot kin iohlad ban bteng ïa ka jingpule jong ki ha kane ka skulbah.
Shuh shuh u la pyntip ruh ba ka skulbah mynta ka la sdang ruh ïa ki Skilled Base Course ha ka Bachelor of Commerce, Bachelor of Arts bad ha ka Bachelor of Science ki ban long ki jingpule kiba plie lad ïa ki samla pule ha ka sengkam sengjam.
