Shillong, K’lyngkot, 23: Ka Mawlai Town Dorbar ha ka sngi Palei ka la pyntip ba kam shym la khang ïano ïano ruh ban ïalap elekshon hapoh ki 17 tylli ki shnong kiba hap hapoh ka jylli jong ka shnong Mawlai ha ka elekshon MDC ka ban sa long ha ka 21 tarik Rymphang.
Ha ka jingïakren bad ki lad pathai khubor, u President jong ka Mawlai Town Dorbar Bah Herlambok War u la ong, “hadien ba ngi la ïohi ba kin sa sdang ki eksamin bapher bapher lyngba ka jingpynbna jong ka Meghalaya Board of School Education (MBoSEO ha u bnai Naiwieng, 2024 ba ki eksamin kin sdang naduh ka 10 tarik, Rymphang bad hapdeng jong kata, ka wan ka elekshon.”
“Ka dei ka por kaba thnem ha ka jingïalap elekshon bad kan pynthud, kan pynwit ïa ki khynnah ki ban ïaleh eksamin,” u la ong bad bynrap, “kum ka Dorbar ngi la luk ïa ki Rangbah Shnong ban khot lang ïa ki kyrtong ha ka sngi Balang ha kaba ngi la ïakren bad ïa pyni jingmut. Da ka jingïahun lang, ka jingïamynjur lang baroh hynriew ngut ki mynjur ïa kata.”
“Ngi kyndit pat ban ïohi ba ha ka social media ba ka Mawlai Town Dorbar ka khanglad, hynrei em, ngi ladep ong ïa ki (kyrtong) ban pynlong ïa ka Common Platform ha manla ki shnong bad la kumno kumno shi miet ha kawei ka shnong yn ïoh ban pyndep,” pynpaw u President ka MTD.
Ki hynriew ngut ki kyrtong ki ban aireng ïa ka elekshon MDC na Mawlai Constituency ki kynthup ïa u MDC ba mynta u Bah Teiborlang Pathaw, u Bah Process T. Sawkmie, u Bah Seiborlang L. Nonglait kiba ïakhun kum ki Independent, ka kyrtong jong ka BJP Kong Daniella Nonglait bad u kyrtong ka VPP u Bah Eddieson Kharumniud.
“Ngi don hynriew ngut ki kyrtong bad lada baroh hynriew ngut ki leit ha manla ki shnong bad lehse uwei uwei u kyrtong un ïoh ban pynlong jingïalang 3 kynta ka la ktah bha ïa ki khynnah kiba pynkhreh ïa ka eksamin. Na kata ka daw, ngi la pdiang lang bad pynlong da ka Common Platform baroh hynriew ngut. Ka Mawlai Town Dorbar ka khlem khang ïano ïano ruh bad kam don aiñ hi ruh ban khang bad ngi dei tang ki Dorbar Shnong kiba ngi ïamir jingmut,” la ong shuh shuh u Bah War.
U Secretary jong ka Mawlai Town Dorbar u Dr. Marco Mitri haba bynrap halor kane u la ong, “ka Mawlai Town Dorbar kam dei ka bor kaba lah ban khang ïa kano kano ka hok jong ki seng saiñpyrthei bad ïa ki kyrtong ban pynlong ïa ka jingïalap elekshon. Ka jingïakynduh hynnin ka sngi ka long beit da ka jingïasyllok lang bad ki (hynriew ngut ki kyrtong) ban ong ba ka long neem ban ym pynlong ïa ka Road Rally kumba la leh ha ka elekshon MLA. Ki (hynriew ngut) pdiang ïa kata bad ki pynpaw ba ki la hun ïa ka rai kaba la ïapynbeit lang bad ka Mawlai Town Dorbar.”
“Kane ka dei ka jingmynjur hi na ki kyrtong kiba pdiang ïa ka jingai jingmut ba la ai da ka Mawlai Town Dorbar, ban thaw ïa ki kyndon haba pynlong ïa ka Common Platform bad ngin sa phah ïa ki kyndon kiba la thoh sha baroh ki kyrtong bad ïa ka jingpan jingbit na u Returning Officer ban kitkhlieh hi da ka Mawlai Town Dorbar ban pynïoh jingbit na ka bynta ki kyrtong,” la ïathuh u Secretary ka MTD.
“Ka rai kaba hynnin ka long ka rai da ka jingïamon lang. Hynrei lada ki don pat kiba ong ba kin ïakhlad noh ka Mawlai Town Dorbar kan donhok aiu hi ruh ban khang ïa ka hok jong ki. Lada kim treh ban wan sha ka Common Platform ruh ka shong ha ki. Ngi hi ngi pyrkhat ym ïa ka ïohnong bad ka duhnong jongno jongno hynrei ka dei beit na ka bynta ka bha ka miat jong ka imlang ka sahlang. Ka Mawlai Town Dorbar kam don bor eiei ban pynbor, ban khang ïano ïano. Dei na kata ka daw ngi la khot lang ïa ki ban pan ïa ka jingmynjur,” ula bynrap shuh shuh.
U la ïathuh ruh wat hadien ka jingïalang kaba la long ha ka sngi Balang na ka liang jong ka Mawlai Town Dorbar ka la telephone ban kylli biang ïa ki kyrtong. “Ki don kiba la bun bad ki don ruh kiba la ong ba kim pat lah ban shim rai. Ki bym pdiang ïa ka jingpynbeit jong ka Mawlai Town Dorbar ki kwah da kawei ka rukom ban leh ïa kata ngim donbor,” la pynpaw u Dr. Mitri.
“Kaei kaba ngi pyrkhat ka long, namarba 6 ngut ki kyrtong kin pynlong jingïalang paidbah ha Standbus hynriew sien kan wanrah ïa ka jingdheng kali bad ngi la mad lut ïa kine kiei kiei naduh ki snem baladep,” u la ong.
Halor ka jingpynpaw jong u kyrtong ka VPP ba um shym la ai rai kumba la paw ha ka social media, u Dr. Mitri u la ong, “hynrei lada ki kyrtong ki pynpaw ba kim sngew ïahap ïa ka jingai jingmut, ngim donbor ban ong leh lane ynnai leh. Ka shong ruh ha ka bor jong ki Dorbar Shnong ban ai jingbit ïa ki kyrtong bad ka Mawlai Town Dorbar kam donbor eiei halor kata.”
