Shillong, Nailar 10: Ka kynhun jong ka executive committee (EC) jong ka Khasi Hills Autonomous District Council (KHADC) mynta ka sngi ka 10 tarik u Nailar 2023 ka la leit ban jurip ia ka Khasi Heritage Village kaba don ha Mawphlang khnang ban lap ïa ki jingduna kiba don ha kane ka jaka na ka bynta ban ïoh pynkhreh ban pynlong biang ïa ka tamasa kaba la tip kyrteng ka Monolith Festival ha u bnai Nohprah 2023.
Ia kane ka kynhun la ialam da u Chairman ka Khasi Heritage Village Management Committee u Bah Victor Rani ha ryngkat ka jingdon lang ki Executive Member (EM) ka KHADC, u Lamphang ka KHADC u Bah Lamphrang Blah, ki ophisar ka konsil bad na ki tnat sorkar jylla.
Ha kane ka jingleit jurip ka KHADC kala rai ban pynlong biang ia kane ka tamasa ba pawnam ka Jylla bala tip kum ka Monolith Festival, kaba la pynsangeh mynta la 7 snem eiei, ha Khasi Heritage Village, kaba don ha Mawphlang.
Ia kane ka tamasa la pynlong kum shi bynta ban khring bha ia ki nongshangkai pyrthei na satlak ka pyrthei bad ban pynim nam ia ka jingriewspah ha ka riti, dustur bad kiwei kiwei de.
Ha ka jingiakren bad ki lad pathai khubor hadien ka jingjurip, u Chairman ka KHADC Bah Lamphrang Blah ula ong ba ka rai ban pynlong biang ia ka Monolith Festival ka dei kaba la leh da ka jingthmu ban pyni nam sha ka pyrthei ia ka spah jong ka Jaidbynriew Khasi ha ka Riti Dustur, ka Deiti Tynrai bad ki jingdon jingem jong u men barim.
U Bah Lamphrang ula ong ba kane ka tamasa ban pynlong mynta u snem kan iapher bha bad ki tamasa ba la dep pynlong, namar ka Sorkar MDA ba la ialam da u Myntri Rangbah u Conrad K Sangma, kan ai jingkyrshan ia ka Council ha kaban pynlong ia kane ka tamasa ha kata ka rukom ban kyntiew ia ka riti dustur bad ka jingpyni ia ki tynrai jong ka Jaidbynriew Khasi.
Ka tamasa Monolith la pynlong khatduh ha u Risaw 2016 ha Khasi Heritage Village, Mawphlang. Hynrei, namar ka jingiakynduh ia ka jingeh ha ka pisa pilain, ka KHADC kala rai ban pynsangeh shuwa ia kane ka tamasa.
Ka thong ba hakhmat eh jong ka KHADC ban pynlong biang ia kane ka tamasa ka long ban pyninam ha kajuh ka rynsan ia ka spah jong ka Jaidbynriew Khasi haba phai sha ka riti dustur, ka dei tynrai bad ka jingdon jingem ki men barim.
