Kenneth Nongsiej
Ka jingthut jong ka synshar khadar ha Ri Bangladesh ka la wanrah ïa ka jingsngewkhia kaba jur ïa ka ri India, khamtam eh ha ki thaiñ shatei lammihngi. Ka Jylla Meghalaya kaba ïasam khappud bad ka Bangladesh kaba 445 km, la khmih ba kan mad ïa ki jingeh kiba khraw ha kaba ïadei bad ka jingwan buhai shnong be-aiñ. Kane ka mat ka long kaba kongsan namar lada ki bor pahara kim lah ban ïaleh pyrshah ïa ka ha ka rukom kaba biang, ka pahara ri ka lah ban ktah jur. Hynrei ka don ka aiñ kaba la don kaba lada pyntreikam pura, ka lah ban peit bniah bad pynthikna ba kan ym don kano kano ka jingma ïa ka jingshngaiñ jong ka ri.
Kaei ka aiñ Meghalaya Residents Safety and Security Act, 2016?
Ka Meghalaya Residents Safety and Security Act, 2016, ka dei ka aiñ kaba la shna khnang ban weng ïa ki jingeh kiba mih na ka jingwan buhai shnong bad kiwei kiwei ki jingeh ha ka liang ka jingshngaiñ. Kane ka aiñ ka bthah ban pynrung kyrteng ïa ki nongshong wai ha ka jylla khlem da khanglad ïa ka jingwan rung jong ki briew kiba nabar. Ka jingthmu ba kongsan ka long ban buddien ïa ki briew shimet kiba shong wai hapoh ka jylla. Ka aiñ ka bthah ïa baroh ki briew shimet (khlem da kheiñ ïa ka niam, ka jaitbynriew, ne ka jaka kha) kiba shong ha ki ïing wai ba kin ai jingtip sha ki thanat pulit jong ka thaiñ bad sha ki khlieh nongsynshar shnong.
Ki jing pyrkhing kiba don nongrim kat kum ka Riti Shynsar ka Ri India
Ki nongrim jong ka Meghalaya Residents Safety and Security Act, 2016 (principal act) kat kum ka Riti Shynsar ka Ri India ka long kaba lah ban ïatai. Lah ban ong ba kane ka aiñ ka hap hapoh ka tnat jong ka “Reasonable Restriction” kiba biang kiba thmu ban pynthikna ïa ka jingshngaiñ jong ki nongshong shnong. Ka Riti Synshar ka ong aiu? Ka Article 19(1)(e) jong ka Riti Synshar ka ai ka hok ban shong ban sah ha kano kano ka bynta jong ka Ri India. Hynrei kane ka hok kam long kaba pura, namar ka Sorkar ka lah ban buh ïa ki kyndon kiba biang na ka bynta ka jingshngaiñ jong ka Jylla. Da kaba bthah ban pynrung kyrteng ïa ki nongshong wai bad ban buddien ïa ki kam jong ki, ka aiñ ka thmu ban pynïadei hapdeng ki jinglaitluid jong uwei pa uwei bad ka jingshngaiñ lang. Khlem kum kine ki kyndon, ki nongleh kam sniew ne ki nongwan buhai shnong be-aiñ ki lah ban pyndonkam bakla ïa ka jingbym don ka jingpeitngor ban ai wai ïing ha ka jylla, kaba lah ban buh jingma ïa ka jingshngaiñ jong ki paidbah bad ïa ka jinglong trai bad ka jinglong ba janai jong ka ri.
Ka jingdonkam ban pynkylla ïa ka aiñ ka long ba lah ban ïatai. Ki kyndon ba la don lypa jong ka Meghalaya Residents Safety and Security Act, 2016, la shim ba ki long kiba biang na ka bynta ban ïada ïa ka jylla na ki riew sniew ne ki nongwan buhai shnong beaiñ. Hynrei ka jingwanrah ïa ka Meghalaya Residents Safety and Security (Amendment) Bill, 2020 ka la wanrah ïa ki jingeh namar ki kyndon ba la wanrah hapoh ka Amendment Bill ki hap hapoh ka Union List jong ka kyrnit ba hynniew (Seventh Schedule) jong ka riti synshar ka ri India. Ka bor ban thaw aiñ halor ka ka jingkhang ïa ka jingleit jingwan hapdeng ki jylla ka shong ha ka Parliament, ym ha ki jylla, bad kane ka jingpynkylla ka ïatyngkhuh bad ka Bengal Eastern Frontier Regulation, 1873 lane ILP. Nalor kata, ka Meghalaya High Court ha ka rai jong ka mukotduma Ibahunlang Nongkynrih v. State of Meghalaya ka la ong ba ka Jylla Meghalaya ka don ïa ka bor thaw aiñ ban pynlong aiñ ïa ka MRSSA, 2016 ha kaba pyntreikam ïa ki bor ba la ai da ka riti synshar. Ki jingpynbeit. Hynrei ha kajuh ka por, ka Ïingkashari ka pyrshah ïa ka jingthaw ïa ki Khyrdop ka kum ki kyndon 17 bad 18 jong ka MRSSA, 2016.
Ki jingktah ha ka liang ka aiñ bad ka saiñ pyrthei
Ka jing ïa tyngkhuh hapdeng ka aiñ jong ka jylla bad ka sorkar pdeng ka pynpaw ïa ka jingïadei kaba jylliew hapdeng ka jingsynshar ha ka thaiñ bad ki jingmyntoi jong ka ri. Ka Riti Synshar jong ka ri India ka buh ïa ki bynta ba kyrpang ha kaba ka sorkar pdeng ka don ïa ka bor kyrpang ban thaw aiñ, bad ka jingkhang ïa ka jingleit jingwan hapdeng ki jylla ka dei kawei na kum kine ki bynta. Da kaba wan rah ïa ki jingpynkylla ka tyngkhuh bad kane ka bynta, ka sorkar jylla ka buh ïa ki jingbym shai ha kane ka aiñ bad ki jingïaleh kiba lah ban mih bad ki bor synshar pdeng. Kane ka la pynlong ïa u Lat ka jylla ban bat ïa ka jingmynjur, kaba don mynta hapoh ka jingpeit bniah jong ka sorkar pdeng.
Lait na ka liang ka aiñ bad ka saiñ hima sima, ka jingjop jong kano kano ka aiñ ka shong ha ka rukom pyntreikam ïa ka. Ka Meghalaya Residents Safety and Security Act, 2016, ka don ka jinglah ban weng ïa ki jingeh kiba khia kiba mih na ka jingwan buhai shnong beaiñ lada pyntreikam pura bad hok ïa ka. Ban pynurlong ïa kane, donkam ïa ka rukom synshar kaba khlaiñ, ki lad ki lynti kiba biang, bad ka jingïatreilang jong ki bor synshar shnong bad ki bor pynjari aiñ.
Nalor kata, ka long kaba kongsan ba ki paidbah kin tip bad ban ïatreilang bad kum kine ki lad ki lynti. Ki nongshong shnong bad ki trai iing ki donkam ban sngewthuh ïa ka jingdonkam ban pynrung kyrteng ïa ki nongshong wai bad ban bud ïa ki kyndon. Ban pynneh ïa ka jingshaniah bad jingkyrshan jong ki paidbah ïa ka aiñ, ka jinglong khuid ka long kaba kongsan, kumjuh ruh ban weng ïa ki jingeh shaphang ka jinglong kyrpang bad ka jingshah lehbein.
Ha kaba pynkut, ka jingthut jong ka synshar ka khadar ha Bangladesh ka buh ïa ki jingeh kiba khraw ïa ka ri India, khamtam eh ha ka jylla Meghalaya bad ha kiwei pat ki bynta jong ka thaiñ shatei lammihngi. Ka aiñ ïada ïa ki nongshong shnong jong ka jylla, ka ai ïa ka lad kaba lah ban peit bad pynbeit ïa ka jingpynrung kyrteng ïa ki nongshong wai, da kaba pynbeit ïa ki jingeh ha ka liang ka jingshngaiñ bad ban khanglad ïa ka jingwan rung ki nongleh kam sniew. Hynrei ka jingïatai halor ka jingpynkylla ïa ka aiñ ba kongsan ka pynpaw ïa ki jingeh jong ka jingsynshar ha ki thaiñ bad ka jingdonkam ban pyntreikam hok.
Ki jingktah kiba kham jylliew jong kane ka mat ki pynpaw ïa ka jingdonkam jong ka rukom treikam kaba ïadei kaba kynthup ïa ki lad aiñ, ki lad synshar, bad ki kam synshar khadar. Katba ka India ka dang ïai bteng ban ïaid lyngba ki jingeh kiba mih na ka jingwan rung be-aiñ bad ki jingma kiba ïadei bad ka jingïada, ka jingpyntreikam kaba jop ïa ka aiñ ïada ïa ki nongshong shnong jong ka jylla ka lah ban long kum ka nuksa na ka bynta kiwei pat ki thaiñ kiba ïakynduh ïa ki jingeh kiba kum kine. Ha kaba kut, ban pynthikna ïa ka jingshngaiñ jong ki nongshong shnong katba dang burom ïa ki hok jong ka riti synshar bad ban pynroi ïa ka jingïatreilang ha ka thaiñ ka long ka kam kaba rit hynrei kaba donkam bha ban pynïadei.
