Shillong, Jylliew 17: U Myntri ka sorkar jylla Bah AL Hek ha ka sngi Baar u la ong ba ka Meghalalya Residents, Safety and Security Act (MRSSA), 2016 ka la long kawei na ki aiñ ba lah ban ai ki jingïada bad jingshngaiñ ïa ki nongjohkai kiba wan sha kane ka jylla.
Haba kren sha ki lad pathai khubor u Bah Hek u la ong ba kane ka aiñ kan pynkup bor ïa ki dorbar shnong ba kin lah ban thoh kyrteng ïa ki briew kiba wan sah ha ki shnong bapher bapher bad kin lah ruh ban ïatreilang bad ki pulit na ka bynta ban ai ki jingïada bad jingshngaiñ ha ki nongshong shnong bad kumjuh ruh ïa ki briew kiba wan nabar ka jylla.
Katkum ka jingong jong u, ka jingbuh ïa ki entry bad exit point kim da donkam than lada la pyntreikam pura ïa kane ka aiñ.
“Ka MRSSA ka dei ka aiñ kaba biang palat na ka bynta jong nga,” u la ong.
U la ïathuh ruh ba hadien ka jingjia shah pynïap jong u nong wangjngohkai na Indore sha Sohra, ka sorkar jylla ka la shim ïa ka rai ban khmih bad bishar biang ïa ka MRSSA bad kumjuh ruh ka la rai ban shut pynnep biang ïa ki bniat jong ka khnang ban ïada ïa ki kam runar kiba lah ban rung sha kane ka jylla.
U la ïathuh ruh ba u la dei uwei na ki nongmihkhmat bad kumjuh ruh kum uwei na ki myntri sorkar ban leit sha Sohra ban bishar ïa ki kam wad ïa ki briew kiba la jah rngai ba kynthup ïa ki shikurim na Indore u (L) Raja bad ka Sonam Raghuvanshi ha Sohra.
“Nga la leit sha katei ka jaka hadien ba la ïoh ki jngpyntip bad ka jingkyrpad na u paralok uba na Indore, Madhya Pradesh,” u la bynrap.
“Uwei u paralok jong nga na Shillong uba dei ruh napoh ka constituency, uba kyrteng u Sagar Sharma, u la pan jingbit na nga ba ka kynhun jong u ka kwah ban leit wad lang ïa kitei ki shi kurim kiba la jah kumta ngi donkam ban ai ka burom ïa kaba khraw ïa ki. Na ka liang ka sorkar ruh kadei ban ithuh ïa kum kine ki briew. Ki la don ruh kiwei kiwei pat kiba la ai ka kti ka mon ka kti ka diang kiba la shim bynta ha kane ka jingleit wad ïa kitei ki shi kurim kiba ka sorkar kadei ban ai burom ïa ki,” u la bynrap.
Na ka liang jong u, u la bynrap ruh ba ka donkam ïa ki pulit ban don da ki tiar ki tar haba ïadei bad kane ka jingleit wad ïa ki briew kiba jah.
