Shillong, Naitung 19: U Myntri Rangbah ka jylla u Conrad K Sangma ha ka sngi Thohdieng u la ong ba ka sorkar pdeng kam shym la ong em hynrei ka dang khmih bniah ïa ka jingtyrwa ban pyntreikam ïa ka Inner Line Permit (ILP) bad ïa ka Meghalaya Residents Safety and Security (Amendment) Bill, 2020.
U la ong ba ka jingpyntreikam ïa ka Meghalaya Residents Safety and Security Act (MRSSA), kaba nyngkong u snem 2016 ka dang treikam met bad mynsiem.
Haba jubab ïa ka jingkylli la ka sorkar pdeng ka ong em ïa kine ki jingdawa ba la sahteng la slem jong ka jylla u Sangma u la ong, “Kam dei kumta. Ha ka jingshisha ha kane ka por ba nga la leit sha Delhi nga la kren ïa ka mat ka khyrnit kaba 8, nga la kren halor ka ILP bad MRSSA bad u Myntri ka Kam Pohïing u Amit Shah bad u Home Secretary bad ngi la ïasyllok ïa kane ka kam, kumta ka khlem ong em hynrei kam pat don ka jingpynthikna bad ki dang khmih bniah ïa kane ka kam.”
U Myntri Rangbah u la pynthikna ba ka sorkar jylla ka la pynshai sha ka sorkar pdeng ba ka MRSSA kam pynkheiñ ïa ka Article 19 ka Riti Synshar ka Ri.
“Ha kajuh ka por kumba nga la ong baroh ki jingsngewkhia ïa kane ka MRSSA bad ka Article 19 kadei kaba ngi la dep ban pynshai sha ka sorkar pdeng. Ngi kdew ba hapoh ka aiñ jong ngi ba ngi la buh ka kyntien registration bad namar kata ka dei kaba la pyntip da ki nongshong shnong kiba sngewkhia. Khnang ba kan ym tyngkhuh ne pynkheiñ ïa ka Article 19 ka Constitution,” u la ong da kaba bynrap, “Kadei kane kaba ngi la pynshai bad mynta ngi ap ïa ka sorkar pdeng ban jubab kylla ïa ki jingpynshai ki jong ngi.”
U la ong ba ka long ka bym dei ban ong ba MRSSA, 2016 khlem pyntreikam da ka sorkar jylla haba jubab ïa ka jingkynthoh ka Khasi Students’ Union (KSU).
“Ha ka jingshisha ka la don ka jingïasyllok kaba lyngkot. Ngi la pynshai ïa kaei kaba la pynpaw da ka sorkar pdeng bad ka jingshisha ba ngi dang buddien ïa kane ka kam. Halor ka jingpyntreikam ïa ka MRSSA, 2016 ngi la pyntip ba kane ka dang treikam met bad mynsiem.”
“Lada ki don ki jingsngewkhia, nga la ïathuh ïa ki bad kiwei ki seng kumjuh ba lada ki don ki jingsngewkhia pyntip ïa ngi, ngin pynthikna kumjuh ruh ki Deputy Commissioner bad ki don ruh ki kam kiba bun ba dang hap ban pyndep hynrei ban ong ba khlem pyntreikam ïa ka MRSSA ka long ka bym dei,” u la ong.
Halor ka jingïoh ILP kiwei pat ki jylla kane ka thaiñ shatei lammihngi u Sangma u la ong, “Ngi lah dep pan jingpynshai na ka sorkar pdeng halor kane bad katto katne ki kyndon ki don ha ka jylla jong ngi kum ka khyrnit ba 6 bad kiwei ki aiñ, nangta ka Land Transfer Act bad kine baroh.”
“Hynrei ha kiwei ki jylla kyrpang hadien ba la wanrah ïa ka CAA, kiwei ki jylla kum ka Arunachal Pradesh, kim don ki kyndon jong ka khyrnit kaba 6 bad kumta ka don ka jingdawa ïa ka ILP. Kumjuh ruh ha Manipur kam don ka jingïada hapoh ka khyrnit kaba 6,” u la ong.
