New Delhi, Jymmang, 12: Ha kine ki sngi ba la dep, ngi la lah ban sakhi ïa ka bor bad ïa ka jinglah tehlakam jong ka ri. Nyngkong nyngshap eh, nga ai khublei kyrpang ïa ki tnat shipai ba khlaiñ bor jong ka ri India,… ki tnat syntiat jong ngi … bad ïa ki stad saïan jong ngi … na ka liang jong uwei pa uwei u nong India.
Ki shipai bashlur jong ngi ki la pynpaw ïa ka jingshlur bakhraw jong ki ban ïoh ïa ki jingthmu jong ka Operation Sindoor. Nga ai nam ai burom ïa ka jingshlur jong ki sha man la ki longkmie jong kane ka ri jong ngi, sha man la ki hynmen para kynthei jong kane ka ri jong ngi bad sha man la ki khun kynthei jong ngi.
Paralok, ha ka 22 tarik u Ïaïong ha Pahalgam, ka jinglong riewkhlaw ba la pynpaw da ki lehnoh ka la pynkhynñiuh rih ïa ka ri bad kumjuh ruh ïa ka pyrthei baroh kawei. Ki riewpaidbah ba lui lui kiba leit kai shuti, ki la shah kylli shaphang ka niam jong ki…bad hadien ki la shah pynïap khlem jingisynei hakhmat ka longïing longsem jong ki, hakhmat ki khun ki kti jong ki … Kane ka dei ka durkhmat ba i shyrkhei jong ki kam lehnoh … ka dei ka kam banbeiñ… ka dei ruh ka jingpyrshang ba i pohdor ban pynthut ïa ka suk ka saiñ jong ka ri.
Na ka bynta jong nga shimet, kane ka jingmong ka long kaba jylliew haduh katta katta. Hadien kane ka jingthombor jong ki lehnoh, ka ri baroh kawei, man la uwei pa uwei u nongshong shnong … man la ka jaitbynriew, man la ki seng saiñ pyrthei… ki la ïeng tylli lang da kawei ka sur ban dawa ba dei ban leh da kaba tyngeh pyrshah ïa ki kam lehnoh … Ngi la ai ïa ka mon laitluid ha ki shipai India ban pynduh pyndam hi thiaw ïa ki lehnoh.
Bad mynta ka sngi, man la ki lehnoh bad man la ki seng lehnoh ki la sngewthuh shai kdar kaei ka jingsneng ba kin ïoh na kaba ñiad noh ïa ki sindoor na ki shyllangmat jong ki hynmen para kynthei jong ngi bad ki khun kynthei jong ngi.
Paralok, ka Operation Sindoor kam dei tang ka kyrteng … ka dei ka jingpynpaw ïa ka jingsngew jong ki phew klur ngut ki briew jong kane ka ri. Ka Operation Sindoor ka dei ka jingsmai khlem kynran dien jong ka jingbishar hok. Ha ka miet jong ka 6 tarik bad ka step 7 tarik u Jymmang … ka pyrthei baroh kawei ka la sakhi ba kane ka jingsmai ka la seisoh. Ki shipai India ki la ther namding khlem jingbakla ïa ki ktem lehnoh ha Pakistan… ha ki jaka ai jinghikai jong ki. Ki lehnoh kim shym la mutdur ba ka India ka lah ban shim kat kane ka rai kaba heh. Hynrei haba ka ri ka ïa tylli lang kawei … kaba dap ba shlei da ka mynsiem jong ka Nation First lane ka Ri Shuwa… haba ka bha ka miat jong ka ri ka don ha kliar duh … la shim ïa ki rai kiba skhem triang… bad ngi ïoh ruh ïa u soh.
Haba ki namding ka ri India ki la her sha ki ktem lehnoh ha ri Pakistan… haba hiar thma ki liengsuiñ drone ka ri India … ym tang ba ki ïing ki sem jong ki seng lehnoh ki la khynñiuh, hynrei ka mynsiem jong ki ruh ka la ring sdot ring swai. Ka Bahawalpur bad Muridke, kiba dei ki ktem lehnoh … ki la long thik kum ki skulbah jong ki kam lehnoh jong ka pyrthei baroh kawei. Ha kano kano ka jaka ba don ki kam thombor lehnoh kiba heh ha kane ka pyrthei kum ka Nine-Eleven… ka jingpynbthei bomb ha London Tube … lane ka jingthombor ki lehnoh ha India… la lah ban buddien ïa ka jingïadon kti lang jong ki sha kine ki ktem lehnoh. Ki lehnoh ki la ñiad pyndam ïa ki sindoor na ki hynmen para kynthei jong ngi … dei na kane ka daw ba ka ri India ka la pynjot thiaw ïa kine ki ktem lehnoh. Palat 100 ngut ki lehnoh ki la shah pynïap ha kane ka jingther kylla ka ri India.
Bun ngut ki nongïalam jong ki lehnoh … kiba ïoh ban ïaid laitlan ha Pakistan ha kine ki 20 ne 30 snem ba la dep … kiba ju ïasuh buit pyrshah ïa ka ri India … Ka India ka la ïoh ban pynïap lut khait ïa ki baroh tang shisien khyrwit.
Paralok, La ker kut ïa ka Pakistan da ka jinglehraiñ hi suiñ na ka daw jong ka jingleh ka ri India … ka la ngiah hi shoiñ … ka la duh jingkyrmen … bad ha kane ka jingduh jingkyrmen jong ka, ka la leh sa kawei pat ka jingbakla. Ha ka jaka ba kan kyrshan ïa ka jingïakhun pyrshah ka ri India ïa ki kam lehnoh, ka Pakistan ka la sdang pynban ban hiar thma ïa ka ri India. Ka Pakistan ka la ther kuli bad namding ïa ki skul bad ki kolej jong ngi, ïa ki gurudwara jong ngi, ïa ki temple jong ngi bad ïa ki ïing ki sem jong ki ‘riewpaidbah … ka Pakistan ka la hiar thma ruh ïa ki ktem shipai jong ngi. Hynrei wat hapdeng kine baroh, ka Pakistan ka la shah thad madan.
Ka pyrthei baroh kawei ka la ïohi kumno ki liengsuiñ Drone bad ki namding ka ri Pakistan ki la saphriang ha madan kum u phlang ïap hakhmat ka ri India. Ki tiar thma ïada suiñ ka ri India ki la pynjot thiaw ïa ki ha suiñ hi. Ka Pakistan ka la pynkhreh ban hiar thma ïa ki jaka khappud… hynrei ka ri India ka la dung beit ïa ka shadem jong ka ri Pakistan. Ki liengsuiñ drone bad ki namding ki la khyrwit khlem jingbakla. Ki la pynjulor ïa ki kad liengsuiñ jong ki shipai suiñ ka Pakistan … ïa kiba ka Pakistan ka sngew sarong bha.
Ha ki laisngi kiba nyngkong eh, ka ri India ka la pynjot haduh katta katta ïa ka Pakistan ïa kiba kam lah satia ban mutdur. Na kane ka daw, hadien ka jingther donbor ka India … ka Pakistan ka la sdang ban wad ïa ki lad ki lynti ba thymmai ban lait im. Ka Pakistan ka la sdang ban kyrpad sha kylleng ka pyrthei ban pynjem lem ïa ki jingïakynad … hadien ba ka la shah rem kput, ha ka por shiteng sngi 10 tarik u Jymmang, ki shipai Pakistan ki la ïakren bad u DGMO jong ngi.
Ha kane ka por, ngi la dep pynjot thiaw ïa ki jingdon jingem jong ki lehnoh … Ngi la rat dyngkhong ïa ki lehnoh … Ki ktem lehnoh kiba don hapdeng ka ri Pakistan ki la shah pynjot bad shah pynduh pyndam ha ngi … na kane ka daw, haba la pynmih ki jingkyrpad na ka ri Pakistan… Haba la ong na ka liang ka ri Pakistan … ba kan ym don shuh kino kino ki kam lehnoh lane ka jingleh palat pud na ka liang ki shipai jong ka … ka ri India ruh ka la sngap ïa kane.
Bad nga ong biang sa shisien … Ngi la shu pynsangeh shipor ïa ka jingther kylla jong ngi ïa ki ktem lehnoh bad ktem shipai. Ha ki sngi ki ban sa wan … ngi sa thew thik pa thik ïa man la ki sien jam jong ka Pakistan halor kine ki bynta … kumno ki leh.
Paralok, Ki lai tylli ki tnat shipai ka ri India, ki shipai suiñ, ki shipai ryngkew bad ki shipai duriaw jong ngi … Ki shipai ïada khappud jong ngi, ki kynhun Border Security Force – bad kiwei kiwe ki kynhun ïada ri, ki la long kiba ïai peitngor bha hadien ka jingther namding bad jinghiar thma na suiñ …
Mynta ka Operation Sindoor ka dei ka rukom treikam ka ri India pyrshah ïa ki kam lehnoh. Ka Operation Sindoor ka la buh ïa u pud ba thymmai ha ka jingïakhun pyrshah ïa ki kam lehnoh … Ka dei ka rukom treikam kaba thymmai. Nyngkong eh – Lada ka don ka jingthombor kam lehnoh ha ri India, yn sa ai kylla ïa ka jubab kaba biang. Ngin sa jubab ha ka rukom jong ngi, katkum ki kyndon jong ngi. Ngin sa leh da kaba tyngeh ïa man la ki jaka na kiba mih ki kam lehnoh.
Kaba ar – Ka India kan ym aili ïa kino kino ki jingpyntieng pynsmiej da ki bomb niwkliar. Ha kaba ïadei bad ki ktem lehnoh kiba khie ba san hapoh ka jingïada ki bor niwkliar, ka ri India kan khyrwit da ka lynti kaba dei bad da ka jingjop.
Kaba lai – Ngin ym peit ïa ka sorkar kaba kyrshan ïa ki kam lehnoh bad ïa ki khlieh nongïalam jong ki lehnoh kum kiba ïaid la ka jong ka lynti.
Ha ka Operation Sindoor… ka pyrthei ka la ïohi biang ïa ka jingshisha ba i saitmet jong ka ri Pakistan… Lano ban ai khublei khatduh ïa ki lehnoh ba la shah pynïap … ki heh shipai ka Pakistan ki la ïalum lang. Kane ka long ka sakhi kaba khraw ïa ka jingkyrshan ïa ki kam lehnoh. Ban ïada ïa ka ri India bad ki nongshong shnong na kino kino ki jingbyrngem byrsit, ngin ïai bteng ban shim ïa ki rai kaba donkam.
Paralok, Ngi la lah ban ïakhun pyrshah ïa ka Pakistan man la ka por ha ki madan thma. Bad mynta, ka Operation Sindoor ka la pyni ïa ka bor bathymmai jong ka ri India. Ngi la pyni ruh ïa ka jingkhlaiñ ha ki jaka ri shyiap bad ha ki lumbah.. Bad ryngkat ruh.. Ngi la pyni ïa la ka jong ka bor ha kane ka juk ïakhun thma ba mynta. Ha kane ka jingïasiat… La lah ruh ban pynshisha ïa ki bor jong ki tiar thma ba la shna hi ha ri India. Mynta ka pyrthei baroh kawei ka la sakhi da la ki jong ki khmat ïa ka rukom ïaleh thma jong ka spah snem ba 21, bad la ïoh ban pyndonkam ïa ki tiar ba la shna hi ha ri India.
Paralok, Ka jingïatylli ban ïaleh pyrshah ïa baroh ki kam lehnoh ka dei ka jingkhlaiñ kaba khraw tam jong ngi. Ka por mynta kam dei ka por ban ïaleh thma.. Bad kam dei hi ruh ka por jong ki kam lehnoh.
Ka jingbym ailad ïa ki kam lehnoh ka dei ka jingpynthikna ïa ka pyrthei kaba bha.
Paralok, Ki shipai Pakistan … ka sorkar Pakistan… Ka rukom ai jingkyrshan ïa ki kam lehnoh.. Ha kawei ka sngi kan sa pynjot hi ïa ka ri Pakistan.. Lada ka Pakistan ka kwah ban im, ka dei ban rat dyngkhong ïa ki kam lehnoh. Kam don shuh da kawei pat ka lad sha ka jingsuk.
Ka nongrim jong ka India ka long kaba shai kdar. Ki kam lehnoh bad ki jingïakren kim lah ban ïa ïaid ryngkat. Ki kam lehnoh bad ki kam khaïi pateng kim lah ban ïa ïaid ryngkat. Bad… Ka um bad ka snam kim lah ban ïatuid ryngkat.
Mynta ka sngi, nga kwah ban ong sha baroh kawei ka pyrthei..
Ki mat treikam jong ngi ki dei.. Lada don ki jingïakren bad ka Pakistan…ngin ïakren halor ki kam lehnoh… Lada don ki jingïakren bad ka Pakistan…ngin kren halor ka Kashmir ba synshar ka Pakistan…
Ko ki paid nongshong shnong jong ka ri, Mynta ka sngi ka dei ka sngi burom Buddha Purnima. U blei Buddha u la pyni ïa ka lynti jong ka jingsuk. Ka lynti jong ka jingsuk ka ïaid ruh ryngkat bad ka jingkhlaiñ. Ka longbriew manbriew ka dei ban ïaid shakhmat ka jinglong suk bad ka jingpahuh pahai.
Man la u nong India u dei ban im ha ka jingsuk.. U dei ban sngewthuh ïa ka jingangnud na ka bynta ka India kaba la ïaid shakhmat.. Na ka bynta kane, donkam ba ka ri kan long kaba khlaiñ… Bad lada donkam, ka long kaba kongsan ban pyndonkam ïa kane ka jingkhlaiñ. Ha ki sngi ba ladep, ka India ka la leh ïa kane. Sa shisien, nga ai burom ïa ki bor shipai baroh. Nga burom ïa ka jingshlur jong ki bad ka jingïatylli jong baroh ki nong India. Khublei Shibun.
