Shillong, Nailur, 25: U Myntri Rangbah ka Jylla u Conrad K. Sangma ha ka sngi Balang u la ong ba ka rai ban ai ne ban ym ai jingbit na ka bynta ban pynlong ïa kano kano ka jingïaid paidbah ka shong ha ki bor synshar District ym ha ka bor jong u Myntri Rangbah.
Haba jubab ïa ka jingkylli halor ka jingpyrshah jur pyrshah ïa ka jingpynbna ban pynlong ïa ka jingïaid proseshon Gau Dhwaj Sthapana Yatra ha nongbah Shillong ha ka 2 tarik Risaw, 2024 ban pynbna ïa ka masi kum ka kmie hapoh ka ri India, u Myntri Rangbah ka Jylla u la ong, “wat ïa ka NPP haba ngi mut ban pynlong ïa ka jingïalang paidbah, nga hap ban pan jingbit na ka ophis DC bad teng teng ka ophis DC kam ai jingbit ïa ka NPP ban pynlong ïa ki jingïalang paidbah.
“Namarkata, kane ka rai ka shong beit ha ki bor synshar District, kam shong ha ka bor jong u Myntri Rangbah, haba u Myntri Rangbah ruh u kwah ban pynlong ïa ki jingïalang paidbah na ka bynta ka party lajong, don ki khep kiba ngam ïoh jingbit na ka ophis DC,” u la ong haba pynkynmaw ba u Commissioner & Secretary u Sanjay Goyal, mynba u dang long u SDO jong ka Ampati, um shym la shah ban pynlong jingïalang paidbah da ki seng saiñpyrthei ha u snem 2008.
U Sangma u la ong shuh shuh, “ngi kren shai halor kane. Ïa ka jingbit la ai ha ka kyrdan Deputy Commissioner bad ka shong ha ki bor synshar distrik ban shim ïa ka rai ban ai lane ban ym ai bad ka ophis Deputy Commissioner da kaba pynshong nongrim halor ki kyndon kiba bun, ki jiinglong jingman, ka lah ban ai, ne ban ym ai jingbit.”
Haba kylli, u Myntri Rangbah u la ong ba kam don kano kano ka jngkhang ïano ïano ruh la ka long ban khang ïa ka jingbam jingdih namarba ka ri India ka dei kaba ai laitluid ïa ka jingmane Blei.
“Ym don jingartatien halor kata. Nga tharai ba kam don kano kano ka daw ba ka Sorkar kan khang ne shah ïano ïano ban khang ïa ka rukom ne ban don la ka jong ka rukom bam,” ula ong.
