Shillong, Naitung 15: U Nongïalam ka BJP bad u Myntri ka sorkar u Bah AL Hek u la ong ba ka party kan sa khot ka jingïakren haba ïadei bad ka jingbujli ïa ka shuki myntri jong ka party.
Haba kylli shaphang ka jinglah ban ïoh ka BJP arngut ki myntri hapoh ka sorkar MDA, u Bah Hek u la phai sha ka party, da kaba ong ba kin bud ïa ka rai jong ka party.
“Phi lah ban kylli na ka party. Ka Party kan sa shim ka rai halor kane ka kam ym na u Bah AL Hek,” ïathuh u Bah Hek sha ki lad pathai khubor ha ka sngi baar.
Lada kane ka treikam, u Bah Hek u la ong, “Ïa kane kawei phi hap ban kylli na ka party. Tang ka Party ka ban ïathuh ïaphi.”
Kane ka jingkynthoh jong u ka la mih halor ka hamsaïa ba u Bah Hek un lah ban shah pynhiar shuki noh kum u Myntri ban ailad ïa u paralok ka party jong u, uba dei u MLA ka South Shillong u Bah Sanbor Shullai ban long u Myntri sorkar kumba 2 snem shiteng ban pynkut artat ïa ka samoi treikam jong ka sorkar ba la ïalam da ka NPP-ka Meghalaya Democratic Alliance (MDA).
