Shillong, Jylliew, 23: Saw ngut ki snar nonglute ki la shah kem ha ki Pulit halor ka jingdonkti ban pynpait ïa kawei kali jong ki nongjngokai pyrthei na Mumbai katba ki dang pynïeng ban rung bamja ha kawei ka restaurant kaba don hajan Mahindra Showroom, ha Mawblei, Shillong.
U Superintendent of Police ka East Khasi Hills u Bah Vivek Syiem ha u kyrwoh ba la phah sha ki lad pathai khubor u la pyntip ba hynnin ka sngi u Blei ha ka por kumba 8 baje mynmiet u Jay Nand Kishore Joshi bad ka iing ka sem ryngkat bad ki shikurim ba dang shu dep ïathoh kiba dei ki nongjngohkai pyrthei na Mumbai, ki la pynieng ïa ka kali Innova hajan ka Mahindra Showroom, Mawblei ban leit bamja miet ha By the Way Restaurant.
Hynrei ynda ki la wan phai, ki la lap ba ki runar ki la pynpait ïa ka iing jong ka kali bad rong tuh ïa ki pla ba la thep ïa ka pisa 50 hajar bad bad kawei ka mobile IPhone 13.
Ïa kane ka jingjia, ki Pulit ki la register case ha Madanrting Police Station.
Ha ka jingbuddien, ki Pulit ka Madanrting Special Party ki la ïohkem ïa ki saw ngut ki snar nonglute na Mawblei Block B bad kurup ruh ïa ki tiar ki tar bad ïa ka pisa.
Ki saw ngut kiba la shah kem ki dei kiba la tip kyrteng kum u Chaphrang Nangkiew Sutnga, 24 snem ka rtta na Mawbleì, u Wanjop Kharumnuid, 23 snem ka rta na Laitkor Nonglum, u Albertstar Kharhujon, 22 snem na Umphyrnai bad u Michael Nongrum, 45 na Demthring Block A.
