Babu Kular Khongjirem
Katba nang ïaid ka juk, katta ka la nang kylla sted bad kata ruh ka kylla da khongpong lut baroh. Kane ka dei shisha ka kuli juk kaba ïapher shisha bak-ly-bak na ka sotti juk kaba ki im hok im sot ha ki por mynshwa.
Lada peit ïa ki kam bad jingleh ki briew mynta, ngi shem ba ki kham tbit ban thok bad shukor bad ban kham nang bha ruh ban kamai thok. Ki briew ki kheiñ triem bha bad ki kham burom ïap burom im bha ruh lada ki kham triem ban thok bad shukor. Lada phi kham nang ban leh hok bad bam klop, kata kin kham ñiew burom shuh shuh ïa ki. Hynrei, lada phi leh hok bad leh ‘riewblei te, phin shah kyntait sha kyndong kynshrot bad ym don ba kheiñ briew ruh ïa phi.
Mynshwa, ki briew ki burom ïa kiba leh rit bad kiba don akor don burom. Mynta pat, lada phim nang ban leh heh leh meng, leh khraw bad sarong, ki briew kim salia bad kim kheiñ snep satia ïa phi. Mynshwa ki kheiñ ‘riewkai bad ‘menaiksuid’ ïa kiba khi ne khap lai nuid. Mynta pat, lada phim nang ban khi ne khap bun nuid ïa u shniuh khlieh, kin kheiñ kum ki ‘riew dum bad ki juk maw.
Mynshwa, ki briew ki lehraiñ ban phong ki sopti ne patlun kiba jot kiba pei khamtam ha ki jaka iew jaka hat ne ki jaka ba bun paidbah kum ha Iewduh ne Khyndai lad (Police Bazar). Mynta pat, lada phim pat nang ban phong ïa ki sopti ne patlun kaba la pynpei thliew lut naduh khohwah wat haduh lbong ruh, kin ong ba phim pat long satia uta/kata ka ‘riew standard ne kaba la tbit ban leh style.
Yn nai ïakren shuh ïa ka akor ka burom namar kim salia bad kim kheiñ snep shuh ïa ka. Lada phi leh donakor marwei, phin shu shah sin kum ki ‘riew daini. Ka ktien ki nang ban kren da ki ktien jali-ja um suda, ki kam pat sha khlaw sha btap. Ka ktien ki nang ban kren kaba thiang kum ka um ngap, ki kam pat kiba sat kum u soh mynken beb. Kat shaba phai kat sha leit, ki buit kyllaiñ bad soitan suda. Lada phi shong ruh jhieh, lada phi ieng ruh kynduh. Kata ka dei ka pyrthei bad ka juk ba phi im bad ïa kynduh mynta ki por. Wat lada kat kata ka juk ruh, hynrei dang don hi khyndiat khynsoit kiba dang im hok, leh tipbriew tipblei, leh tip kur tip kha, kiba dang kamai ïa ka hok ka shikyntien bad kiba dang tieng bad lehraiñ ïa U Blei.
Kine ki khyndiat ngut ki dei ban im da kaba’ sian kum ki bseiñ bad jem nud kum ki paro, lada shida than ka ban ïap namar kin shim kabu ïa ka jinglong hok bad shisur jong phi.
Kane ka im suk bad kamai suk ruh ka ban poi sha ka ma. Ka pisa ïoh ei, ka pisa kamai suk bad ka pisa thok pisa shukor kaba shet kylla ïa kane ka pyrthei haduh katne, kaba la pynjot, pynlamwir bad wanrah ïa ka apot sepngi ha kane ka juk jong ngi mynta.
