Shillong, Naitung, 02: U MLA ka North Shillong Constituency Bah Adelbert Nongrum u la ong ba ka dei ka kamram jong ka Voice of the People Party (VPP) ban pyntip sha u Lamphang jong ka Iingdorbar Thawaiñ ka jylla hadien ka jingsospon ïa u kum u dkhot jong ka Party.
Ha ka jingïakren bad ki lad pathai khubor ha ka sngi Balang, u Bah Nongrum u la kam ba katkum ka jingïakren jong u bad u Lamphang ka Iingdorbar Thawaiñ u Thomas A. Sangma um pat ïoh pdiang ïa kano kano ka shithi na ka VPP.
“Kam dei ka kamram jong nga hynrei ka dei ka kamram jong ka party ban ai kopi sha u Lamphang jong ka Ingdorbar Thawaiñ bad nga la ïoh ban ïakren bad u Lamphang ba kam don eiei kum kata,” u la ong.
Haba kynthoh tyngeh ïa u nongaiktien jong ka VPP u Dr. Batskhem Myrboh, u MLA jong ka North Shillong u la ong, “ngan sa leh ruh la ka jong ka kamram, ban ai ka jinghikai bad ban ai ka jingsneng ïa kine ki paralok kiba kam ïalade kum ki Professor kiba ngam tip ki dang biang neem ban long Professor ba kin leit phai sha ki jaka ai jinghikai ne University ba kin ai jinghikai ïa ki samla pule ne ba kin wan sha ka saiñpyrthei ba kin ai jinghikai ïa ki paidbah.”
Haba kynthoh shuh shuh ïa ka jingweng dkhot ba shipor ïa u, u la ong, “haba nga peit ïa ka rukom sospon ïa nga, nga ïoh ba ka dei ka termination (jingbeh seng). Ki paidbah ka rilum Khasi bad Jaiñtia ki dei ban sngewthuh ba kane ka dei ka kam arsap bad ka kam khawpud.”
“Lada phi pyndonkam ïa nga te to. Hynrei ban shah pyndonkam ki paidbah bad ka jaidbynriew ngan ym ailad. Nga ieng ha ka nongrim ba ïa ki paidbah ngan ym ailad ban pyndonkam bakla ïa ki na ka bynta ka jingmyntoi jongno re jongno,” u la ong.
“Nga sngewsih kthang ba kam don jingburom hapdeng jong ki, kim tip ïa ki rul ki aiñ imat,” la kynthoh u Bah Nongrum.
U la takraiñ ruh ïa ka VPP ba ki nongïalam kim shym la kdew hi ruh ïa u kum u MLA ha ka shithi ba la sospon ïa u bad ong ba ka long kum ka jingibeiñ ïa ki paidbah jong ka North Shillong Constituency kiba la jied ïa u kum u nongmihkhmat.
Haba kylli u la ong, “haduh mynta nga dang dei u dkhot ka VPP ym don mano mano ruh ba lah ban khang ïa nga. Kane ka dei ka ri synshar paidbah laitluid bad nga don ruh ïa ka hok ba ngan kren laitluid.” u la ong.
