Shillong, Nailar 04: Ka samla Bahun Nongrum ka la jop kum ka Miss Meghalaya katba ka samla Fortunate Mika Dkhar kum ka Miss Teen Meghalaya 2024.
Ïa kane ka rynsan la pyllong ha ka sngi Saitjain ha Lariti Multipurpose Hall, Mawkasiang. Ka samla Chaivalry Lartang bad ka samla Lily Kharthangmaw kila jop ha ka 1st bad 2nd runners-up ha kane ka jingïakop ki thei bha briew.
Ka samla Bahun kan mihkhmat ïa ka Meghalaya ha ka Miss Universe India 2024, katba ka samla Chaivalry bad ka samla Lily kan mihkhmat ïa ka Meghalaya ha ka Miss Northeast 2024 ka ban long ha Itanagar, Arunachal Pradesh.
Ha ka kyrdan ka Miss Teen, ka samla Palei Chyne bad ka samla Nikita Nongrum kila wan ha ka 1st bad 2nd runners-up. Ka samla Fortunate kaba jop ïa ka Miss Teen kan mihkhmat ïa ka Meghalaya sha ka rynsan Miss Teen Diva ka ban long ha Jaipur, Rajasthan.
Ïa kane ka rynsan la pynshong kun shuh da ka jingdon u myntri ka tnad jngohkai bah Paul Lyngdoh, kumjuh u bah Sanbor Shullai, Chairman ka Meghalaya Tourism Development Corporation (MTDC) nalor u bah Federick Roy Kharkongor, Principal Secretary ka tnad Arts and Culture.
Ki nongbishar ha kane ka jingïakop ki long u Amjad Khan, Director ka Operations and Marketing for Miss Universe India; ka Arshina Sumbul, Miss Grand International India 2023; ka Divija Gambhir, State Director for Miss Universe Rajasthan and Miss India Multinational 2021; bad u Mele Pucho, State Director for Miss Universe Nagaland.
Kaba jop ïa ka Miss Meghalaya 2024 ka ïoh ïa ka khusnam T. 1 lak, katba kaba long baar ka ïoh T. 50,000 bad kaba balai T. 25,000.
Ka lahduh ka Miss Teen Meghalaya 2024 ka ïoh T. 25,000 katba kaba long baar ka ïoh T. 15,000 bad kaba lai T. 10,000.
Ïa kane ka rynsan la kyrshan da ka Meghalaya Tourism bad ka tnad Arts and Culture jong ka Meghalaya.
Kiwei pat ki nongjop ha ki kyrdan bapher bapher ka Miss Meghalaya ki long ka samla Jingieit U-Ai Timung ïa ka Miss Rampwalk, ka samla Dorachiva Daw ïa ka Miss Congeniality, ka samla Chaivalry Lartang ïa ka Best Outfit, samla Christine Anaiah Nongrum ïa ka Miss Beautiful Smile, samla Ibadonbokshisha Marwein ïa ka Miss Personality, samla Rimika Dkhar ïa ka Miss Talented, bad ka samla Bahun Nongrum ïa ka Miss Perfect 10.
Ha kiwei ki kyrdan jong ka Miss Teen Meghalaya kiba jop ki long ka samla Nikita Nongrum ïa ka Miss Talented, samla Aranza Yamini Pariat ïa ka Miss Congeniality, bad ka samla Palei Mynsiem Chyne ïa ka Miss Popular.
