Shillong, Naiwieng, 06: U Sordar ka Shnong Mawryngkneng Bah Peter J. Lawai u la ai jingkyrshan ïa ka jingïakhih jong ki nongñiah trok kiba don hapoh ka shatri jong ka Meghalaya Commercial Truck Owners and Driver’s Association (MCTO&DA) u la kynthoh da kaba ong, “ka Secretariat ka la don lypa hangthie (ha East Jaiñtia Hills) bad katei (ha Shillong) ka dei tang ka Rubber Stamp hynrei kiba pynïaid ïa ki kam ki jam dei ki thie nangthie. Ka mut ka Secretariat ka don lypa ha ki karkhana dewbilat.”
Haba kynthoh ïa ka Sorkar Jylla, u Bah Lawai u la ong, “ka don jingïohnong jong ki seng saiñpyrthei na ka jingbei tyngka jong ki karkhana pynmih dewbilat lehse ha ka por elekshon dei kine (ki kharkhana dewbilat) kiba bei tyngka ban thied paidbah bad ban thied vote. Lada ki (seng saiñpyrthei) ki pyndik ïa ki karkhana pynmih dewbilat kin sa duh ïa kine ki jingïohnong jong ki.”
“Kiba khyrwait shabi ïa ka jylla jong ngi, dei ki marwari, kine ki khyllah jait, watla ngi don makna ki Myntri Sorkar Khasi, ki MLA, hynrei kine ki dei tang ki ñiangkohnguh kiba shah khyrwait shabi ha ki bar jylla,” la kynthoh shuh shuh u Bah Lawai.
Haba takraiñ kylla ïa ki jingkynthoh ba ka Dorbar Shnong ka ai jingbit ïa ki nongñiah trok ban pynlong ïa ka jingïakhih ha ka shnong Mawryngkneng, u Sordar ka Mawryngkneng u la ong, “ka jingai jaka ka dei ka jingai jong ka riti synshar ka ri India kam dei ka jingai jong nga, lada kita kiba kynthoh ai kin leh sha Parliament ban pynbeit thymmai noh ïa ka riti synshar jong ka ri India balei la shah ïa ki nongshong shnong ban thaw ïa ki Association, ban ïakhih. Ka jingkylli kaba mih mynta ka long hato ngi im ha ka ri synshar donbor ne ka ri synshar paidbah.”
“Lada ma nga u Sordar Shnong ngam shah ïa ki nongshong shnong ban pynlong ïa ki jingïakhih ka pyni ba nga synshar donbor hapoh ka shnong ka thaw. Haba kine ki ïakhun, ki ïakhih khlem rah tiar, khlem rah dieng, khlem rah lathi, hynrei mynta kine ki long ki sohpdung,” u la ong.
Da kaba kynthoh ïa ka jingpynbthei tear gas u Bah Lawai u la ong, “kiba lah ban pyndonkam tear gas dei tang ki Pulit, kiba lah ban thied tear gas dei tang ka tnat Pulit nga tharai kim ai laisen ïa ki riewpaidbah, ïa ki nongñiah trok ban thied tear gas. Hangta phi dei ban sngewthuh mano ba sdang bad mano ba leh ïa ki kam pyntriem, hato ym dei ki Pulit?”
“Ngi la ïoh jingtip ba ki Pulit ki la pynthud wat ïa kiba leit ba wan, kiba pang ba shitom da kaba knieh ïa u shabi kali ban kawang da u tear gas hapoh kali. Lada jia ba bthei u tear gas hapoh kali, mano ba mynsaw. Hato kam dei ka kam lehnoh ba ki pynthud ïa kiba leit ba wan hapoh surok?” la buh jingkylli u Bah Lawai.
U la ong ruh ba kum ki trai shnong ki sakhi ba kam don ka jingpynthud ïa ka leit ka wan jong ki paidbah hynrei dei ki Pulit kiba pynthud ïa ka leit ka wan jong ki paidbah.
U la ong ruh ba ka Dorbar Shnong ka ai jingkyrshan ïa ka jingïakhih jong ka MCTO&DA namarba ka long kaba don nongrim.
“Kaba jia hynnin bad kaba jia mynta ngi sngew ban ong ba ka dei ka jingpynibor palat liam jong ki bor Pulit, bor sorkar ban thombor bad iuhroit ïa ka hok jong ki nongbylla barit baria bad ban pyntieng pynsmiej ïa ki nongshong shnong. Ka Dorbar Shnong ka pynrem jur ïa ka jingleh donbor jong ki Pulit bad ka sorkar Meghalaya. Lada ki dang bteng shibit lane lashai, na ka liang jong ka Dorbar Shnong ngim banse ban shim da ka rai kaba tyngeh da ka Dorbar Shnong,” la bynrap u Bah Lawai.
U la kynnoh ruh ba ka tnat Pulit kam shym la kheiñ shuh ïa ka bor ka iktiar jong ka Dorbar Shnong namarba ki Pulit ki la rung hapoh ka shnong khlem da ïoh jingbit na ka Dorbar Shnong.
“Tang ban pynhun ïano re ïano sha lyndet mynta kim kheiñ kor shuh ïa ka bor ka iktiar jong ngi ki Rangbah Shnong bad ki Dorbar Shnong. Kane kam long tang ïa nga shimet, hynrei kane ka jingleh ka la rung ha manla ki thliewiing jong ki nongshong shnong ba ka don ka jingdom ka jingbitar.”
“Sangeh shisyndon ïa kane ka jingpynbor ko ki bor sorkar bad bor Pulit namarba kane ka thma nangne kan sdang ïoh kan klang sha baroh kawei ka ri bad ka jaidbynriew. Lada phi kwah ban ïohi ka jingshongsuk ha ka jylla Meghalaya ai noh mynta mar mar ïa ka jingdawa,” u la ong shuh shuh.
