Shillong, Nohprah, 02: Ka Services Sports Control Board ka la khur ia ka nam kum ka kynhun iakura kaba kynsai ha ka sngi kut jong ka 7th Elite Men’s National Boxing Championship hynne ka sngi ha SAI Indoor Hall bad kane ka kynhun ka la lah ban khur haduh 10 tylli ki jingjop ha kane ka jingiakhun final.
Kane ka kynhun jong ka Services ka la sar naphang ha kaba 12 ngut ki la rung sha ka final ha ki 13 tylli ki bout bad ka la khur jingjop 10 ngut napdeng kine ki 12 ngut.
Ha kane ka sngi la lah ban pynlong ia baroh ki jingiakhun final na ki 13 tylli ki bout, ha kaba ki khlur iakura kum u Shiva Thapa na Assam, Amit Panghal na ka Services bad u Sanjeet an ka Services ki la khur ia ka jingjop. Ha kine ki hynniew tylli ki sngi, ki paidbah na ka jylla ki la ioh ban sakhi ia kane ka lympung iakura kaba la long ha kane ka nongbah naduh ba ka la ioh ban pynlong ia ka South Asian Games ha u snem 2016.
Ia kane ka lympung kaba la sdang naduh 25 tarik u Naiwieng, la pynlong da ka Meghalaya Boxing Association (MBA), ryngkat ka Boxing Federation of India (BFI) bad la kyrshan lang da ka tnat Sports and Youth Affairs jong ka Sorkar Jylla.
Ha kane ka sngi la wan sakhi lang da u Myntri ka tnat ialehkai u Bah Shakliar Warjri, kumjuh u MLA ka Mawlai u Bah Brightstarwell Marbaniang, kumjuh u Secretary General ka BFI u Hemanta Kumar Kalita bad u Working President ka Meghalaya State Olympic Association u Bah John F Kharshiing nalor kiwei pat
Ki la don haduh 9 ngut ki rangiakura ak Jylla kiba la ioh ban iashim bynta bad tang ar ngut kiba la lah ban jam shaduh ka pre-quarterfinal, hynrei ki la mad noh ia ka jingshah rem watla ki la lah ban pynpaw ia ka jingtbit ha kane ka jingiakhun.
Ka jingwanrah ia kum kine ki lympung ka la long ka jingpynshlur bad ai mynsien ia ki nongialehkai ka Jylla ba kin long kiba trei shitom. Te kumta ka long kaba donkam ban ioh ia ki jaka ialehkai kiba biang, ki rukom jied kiba kat kum ka juk mynta bad ka jingai jinghikai kaba paka na ka bynta ban kyntiew ia ki nongialehkai bad ruh ban lah ha ka ban pynurlong na ka bynta ban ioh rung sha ka Olympic Games.
“Nga sngwkmen ban iohi ia ka jingtrei shitom hapdeng ka MBA, BFI bad ka Sorkar Jylla ha kaba ka la long kaba jop,” la pynpaw u Bah Warjri. “Naduh ba nga la shimti kum u Myntri ka tnat ialehkai, nga la ioh ban iaid kylleng ka jylla bad nga la ioh ruh ban iakren bad ki samla bad ki nongialehkai. Ka Sorkar ka iohi jngai ia ki nongialehkai kiba don ia ki sap ialehkai ba kynsai bad ngi donkam ban iatrei lang bad ki samla lem bad ki synjuk ialehkai na ka bynta ban iohi ia ka jingkiew ki nongialehkai. Kane ka dei ka thong ka jong ngi bad ban pynurlong ia ki.”
Shuh shuh utei u Myntri u la pynpaw ruh ha kaba iadei bad ka jingshim khia na ka bynta ban tes haduh 14,500 ngut ki khynnah ialehkai. Napdeng kitei, 200 ngut la pynduna ki ban hap hapoh ka Elite Pathway Programme bad haduh 12 ngut kiba la shah jied ban ioh rung sha ka Super Elite Pathway Programme.
Ha kane ka lympung manla uwei pa uwei u rangialehkai ki la hap ban iakhun haduh saw sien ban ioh rung sha ka final bad kiba bun ki bout kiba la kut hynne ka sngi ki dei kiba la iarai lang da baroh ki nongbishar.
Ha kane ka jingiakhun, u Barun Singh na ka Services u la lah ban pynliem noh ia u Yaiphaba Soibam na Manipur da 5-0 ha ka 46-48kg, hadien la bud sa u rangiakura uba la khur ia ka takma rupa ha ka World Championships 2019 u Amit Panghal (Services) uba la jop ia u Anshul Punia na Chandigarh da 5-0 ha ka flyweight 48-51kg.
U Lalit jong ka All India Police u la long uba nyngkong ban pynliem ia u rangiakura uba na ka Services u Pawan, ha ka bantam 51-54kg da 4-3.
Ha ka final jong ka featherweight 54-57kg ki ar ngut ki Sachin ki la lah ban khur ia ka takma ksiar, ha kaba ka Services ka la jop ia ka Railways. Hadien ha ka final jong ka lightweight 57-60kg, ka Services ka la jop ia ka Railways lyngba u Akash uba la jop ia u Varinder Singh.
U Shiva Thapa na Assam u la lah ban pynliem noh ia u rangiakura na ka Services ha ka light welterweight 60-63.5kg. Watla ma u lem bad u Vanshaj ki la iakhaid ha ka rukom iakhun, hynrei na ka liang ki nongbishar ki la rai jop ia u Thapa.
Ka Services ka la khur jingjop biang ia ka jingjop ha kiwei pat ki hynriew tylli ki jingiakhun final. Ha ka welterweight 63.5-67kg, u Rajat u la jop ia u Abhishek Yadav na ka Railways, katba u Akash u la pynliem ia u Abhinab Saikia na Assam (uba la ioh ia ka nam Best Challenger Boxer) ha ka light middleweight 67-71kg. Ha ka middleweight 71-75kg, u Deepak u la jop ia u Ishmeet Singh na ka Railways bad u Lakshya u la lah ban pynliem noh ia u Harsh Choudhary na Rajasthan ha ka light heavyweight 75-80kg. Kine baroh ki jingjop ki long da 5-0.
Ka jingiakhun kaba khadwei ka dei ka cruiserweight 80-86kg, u Vishal na Haryana u la sdang ban pyni ia ka jingkhlaiñ bor hashwa ba u Jugnoo na ka Services un kura da kaba tyngeh ha ka wat kaba khatduh na ka bynta ban jop da 5-2.
U Sanjeet na ka Services, uba long u lahduh ha ka Asian Champion 2021 u la khur jingjop ha ka heavyweight 86-92kg da 5-0 pyrshah ia u Naveen Kumar na Haryana.
Ha ka jingiakhun final kaba khatduh jong ka super heavyweight 92kg-plus hadpdeng u Sagar na ka Railways bad u Jaipal Singh na ka Punjab. Ha kane ka jingiakhun u Sagar, uba la khur ia ka takma rupa ha ka Commonwealth Games 2022, u la shah rem noh ha ka wat kaba lai hadien ba u Jaipal u la kura da kaba tyngeh bad na ka liang u rephri u la hap ban pynsangeh noh ia ka jingialehkai.
Ha kane ka lympung, ka Services ka la iohpdiang ia ka nam Best Team, u Akash u la iohpdiang ia ka nam Best Boxer bad u coach ka SSCB u Jai Patil u la iohpdiang ia ka nam Best Coach. Ka Railways ka la wan ha ka kyrdan ba-ar. ia ki khusnem shimet la khur da u Abhinab Saikia na Assam ia ka nam Best Challenger Boxer bad u Pradeep Bisht ia ka nam Best Official. Ka Meghalaya ka la iohpdiang ia ka khusnam Fair Play.
