Shillong, Lber, 15: Ka kynhun ïalehkai jong ka Shillong Lajong Football Club ka la ïohrah ïa ka nam lahduh ha ka lympung ïalehkai jong ka Shillong Premiere League 2024 ba la pynlong da ka Shillong Sports Association ha ka 15 tarik Lber, 2025 da kaba pynliem noh ïa ka Mawlai Sports Club da 2-1 kol.
Da kane ka jingjop, ka Shillong Lajong ka la ïoh rah ïa ka trophy bad ïoh khur ruh ïa ka khusnam da ka song pisa kaba 6 lak tyngka katba ka Mawlai Sports Club kaba la wan baar ka la ïoh khur ïa ka song pisa kaba 3 lak tyngka.
Ha kane ka jingïakhun kaba la long ha madan ïalehkai jong ka SSA, ka Shillong Lajong ka la ïoh ban pynkhih nyngkong eh ïa ka jar ha ka minit kaba 10 lyngba u Abhay Chettri tang shu mar ïa sdang ka jingïalehkai ha ka kylla step.
Ynda la bteng biang ïa ka jingïakhun ha ka kylla miet, ka Shillong Lajong ka la ïoh ban pynkhih biang ïa ka jar ha ka sien kaba ar ha ka mimit kaba 76 lyngba u Samshaphrang Lato.
Watla ki rangïalehkai jong ka Mawlai Sports Club ki la pyrshang ban pynphai kylla ïa kine ki ar tylli ki kol khnang ban ïoh rah ïa ka nam lahduh tang da kaba shu ïoh ban pynïakhaid, hynrei ka por ka la dier palat ha kaba kum ka kynhun ka la shu ïoh pynkhih ïa ka jar tang na ka bynta shi kol tad haduh ka minit kaba 88 lyngba ka jingïoh shut penalty lyngba u Damanbhalang Chyne.
Ha kane ka sngi, u Myntri jong ka tnat Sports and Youth Affairs ka Sorkar Jylla Bah Shakliar Warjri uba la long akum u Kongsan u la aiti ïa ka song pisa kaba 8 lak ba la bhah na ka sorkar jylla kum ka jingkyrshan bad ka jingïarap pisa ïa ka Shillong Sports Association.
