Shillong, Jylliew 14: Kum shi bynta na ka jingpynkhreh ïa ki elekshon ka ban wan ha u snem 2028, ka BJP ka la thung ïa ki nongkitkam ba thymmai jong ka jylla na ka bynta ka samoi treikam jong u snem 2025-2028 da kaba ong ba ka party kan ym mihnoh napoh ka sorkar Meghalaya Democratic Alliance-2 ba la ïalam da ka National People’s Party (NPP).
“Kumba ka party ka dang pynkhreh ïalade na ka bynta ka elekshon ka ban wan ha ka jylla, u national president ka BJP u JP Nadda u la mynjur ïa ka kynhun ba thymmai jong ka jylla ka ban khmih ïa ki kam pynkhreh jong ka seng na ka bynta ki elekshon ha u snem 2028,” ïathuh u state president ka BJP u Rikman G Momin sha ki lad pathai khubor ha ka sngi Saitjaiñ.
“Hapoh ki jingpynïaid, ki don ki por kaba ngi donkam ban pyntyllun ïa ki kam jong ka party. Kum ka party, nga dei u khlieh jong ka party bad nga hap ban peit kumno ka seng ka ïaid. Nga donkam ban pynkylla ïa katto katne kiba ym da lah ban treikam bha na ka bynta ki jingïaid beit ki kam ki jam jong ka party,” u la bynrap.
La ka party ka pyrkhat ban wengnoh ka jingpynïasoh bad ka sorkar ba la ïalam da ka NPP ha ka jylla, u Momin u la ong, “Kane ka shong ha ka jingbthah ki nongïalam ka party ha Delhi naba ka NPP ka dei kaba ïatreilang bad ka BJP lyngba ka sorkar NDA kumta ki dang don hi hapoh ka jingïatreilang.”
U la ong ba kano kano ka rai halor kane ka bynta yn sa jubab hi da ki nongïalam jong ka sengkmie.
Katkum ka jingong jong u, ban ïatreilang bad ka NPP kan ym ktah satia ïa ka BJP ha Meghalaya.
U Momin u la ïaroh ruh kumjuh ïa ki jingtreikam jong ka sorkar MDA-2 bad u ong, “Ka la leh bha ïa ka kam”.
Shuh shuh u la ïaroh da kaba ong, “U Myntri Rangbah u la trei shitom bha bad kum kiba don bynta lang hapoh ka sorkar, ngi ai ruh ka jingkyrshan ïa ki kat kaei kaba ngi lah. Ka sorkar MDA government-2 ka la treikam bha bad phi la ïohi ïa kiba bun ki kam pynroi kiiba wan shakhmat.”
Haba kylli, u Momin u la ong ba ki don ki bym sngewhun haba ka sorkar pdeng kam ai ticket ïa ka party ban ïakhun ïa ki elekshon Lok Sabha.
“Hato ka por ki la kynnoh ïa u president ka jylla. Ka lah ban long ba ha katei ka por ki la don kiba pyrshah hynrei mynta ka kam ka la ïaid beit. Ngi la bud ïa baroh ki prokram jong ki nongïalam ka sengkmie. Ngi la don ka kynhun kaba biang bha mynta,” u la bynrap.
Shuh shuh u Momin u la ïathuh ruh ba ki la don bun ngut kynthup ïa ki MLA barim kiba la pynpaw ka jingsngewmon ban pynïasoh sha ka party.
“Ngi pdiang sngewbha ïa baroh sha ka party jong ngi, ban trei na ka bynta ka party bad ka jylla baroh kawei,” u la ong.
Ki nongkitkam ba thymmai ki kynthup ïa ki 6 ngut ki vice president, u Bah Khrawboklang Basaiawmoit, Dr Bernadette Lyngdoh bad Er Bipen Pradhan (Shillong City), Bernard N Marak bad Anil Hajong (Tura city), Lakhon Biam (West Jaiñtia Hills), nangta arngut ki state general secretary u Bah Wankibok Pohshna bad Amitava Saha, bad 6 ngut ki state secretary – Anzie Ellicia A Sangma, Belbora Wankhar, Daniella L Nonglait, Sukhi Pariat, Commanderful Sana bad Wilber Danngo Marak, nangta ki state treasurer – Sarwan Jhunjhunwala, state joint treasurer – Ashok Singhania, media convener – Sabyasachi Ghose, chief spokersperson – Mariahom Kharkrang, IT convener – Sarad Bawri, social media convener – Fredee Aaron Kahit, office secretary – Dipika Dey bad state cells convener – Deeya Singh Rathore.
