Shillong, Naiwieng, 11: U nongaibuit jong ka tnat Social Welfare ka Sorkar Jylla Bah Paul Lyngdoh ha ka sngi Baar u la ïathuh ba ka tnat ka ladep phah ïa ki Standard Operating Procedure (SOP) ha kaba ki jingktah bapher bapher jong ka POCSO bad ka jingshisha ba ka don ka jingïashongkha khlem pat dei ka por jong ki heprit shynrang bad kynthei, kumno ban trei ïa ka jingpynïadei hapdeng kaei kaba la leh bad kaei kaba ka aiñ jong ka ri ka ong, kumno ngin wanrah ïa ka jingpynïadei hapdeng kine ar.
Haba kren sha ki lad pathai khubor hadien ba la wai Consultative Meeting bad ki kynhun bapher bapher u Bah Paul u la ong, “ngi ladep aiti ïa ki SOP jong ngi bad mynta ka dang don ha ka kti jong u Advocate General jong ka jylla ban un ai ïa ka jingsngew ba khatduh jong u bad hadien kata ngin sa lah ban pynmih paiddbah bad yn sa aiti ruh sha ki Kashari bad khamtam eh sha ka Iingbishar Meghalaya High Court namarba ki don bun tylli ki case kiba dang sah pongding ha kaba ïadei bad ka jingshong kha khynnah,” u la bynrap.
U Bah Paul u la ïathuh ruh ïa ki jingeh ha kaba ïadei bad ka jingpyntreikam ïa ki aiñ kum ka Protection of Children from Sexual Offences (POCSO) Act ha ki shnong nongkyndong, ha kaba ka jingpynshai paidbah shaphang kane ka aiñ ka dang duna bha.
“Ka aiñ POCSO kum ka nuksa ka dei kaei kaei kaba bun ki shnong nongkyngdon kim pat tip bha bad namarba ha Meghalaya ym shym la pynlong aiñ ïa ki jingïashongkha khynnah, namarkata, ka kylla long sa kawei pat ka jingeh. Namarba ngim ju don ka jingshongkha dang ha ka rta ba dang khynnah, hynrei ngi lap ba ki don kiba pynshongkha dang ha ka rta kaba dang khynnah ha kiba bun ki bynta jong ka jylla, ngi lap ba ki don bun ngut ki khynnah kynthei kiba la pun khun dang ha ka rta kaba 13-14 snem bad haba ka aiñ ka treikam phi hap ban kem ïa ki nongpynkheiñ aiñ hynrei ka shnong kan kyrpad ïa ngi ba kane ka dei ka rukom ba la ju leh naduh ki pateng ba la leit noh. Kine ki dei ki jingeh ïa kiba ngi hap ban pynshai paidbah ha kata ka bynta,” u la ong bad bynrap, “ngi don ki Counsellor, ki Expert, bad ki CDPO kiba ju leit rung sha ki shnong kiba jngai ban pynshai paidbah shaphang kine ki aiñ.”
U Bah Paul u la banjur ruh ba donkam ïa ka jingpeitngor lem jong ka imlang ka sahlang bad ban pynkhlaiñ ïa ki Village Defence Party (VDP) ban ai jingkyrshan ïa ki bor jong ka aiñ.
“Ha ka jingshisha kane ka dei kawei ka bynta ha kaba nga la ju ïasaid ban lait na ka jingrung ki bor jong ka aiñ, ngi hap ban pynshlur ïa ka jingpeitngor jong ka imlang ka sahlang kaba duna bha haduh katta katta ha ka jylla jong ngi. Katto katne tylli ki shnong ki don ïa ka Police Outpost lane ka Police Station kaba jngai bha, kaba shim por ym duna ïa ka 3-4 kynta ban poi sha ka Putpost lane Police Station pulit ba jan tam hynrei kaei kaba ngi leh ka long ban pynshlur ïa ki kynthei bad ha ka jingshisha ka shnong baroh kawei ka ju ïarap ïa ngi ban peitngor ïa ki jingjia hapoh ki shnong ki thaw lyngba ki Village Defence Party (VDP) ïa kaba la pynskhem da ka aiñ. Kine ki VDP ki dei ruh ki bynta jong ka tnat Pulit,” u la ong.
“Ngi kwah ban thaw ïa ki lad ki lynti ha kaba ka shnong ka dei ban tip bad kan kyrshan ïa kata ka jingtreikam kaba ngin dup lah ban kynjoh sha ka thong khnang ban pynduna syndon ïa ki jingthombor pyrshah ïa ki kynthei bad ki kam runar ruser pyrshah ïa ki kynthei bad ki khynnah,” u la bynrap.
