Shillong, Jylliew, 19: Ka ophis District Sport Officer West Khasi Hills ha ka sngi Palei ka la pynhap pyrda ïa ka lympung ïalehkai phutbol jong ki skul kaba la tip kum ka District Level Subroto Mukherjee Cup Football Tournament.
Ha ka jingïakhun phainal ha ka kyrdan Under-15 jong ki khynnah shynrang ka skul KJP Synod Higher Sec School ka la ïoh khur ïa ka jingjop hadien ba ka la lah ban pynliem noh ïa ka St. John Bosco Hr Sec School da 2-1 kol lyngba ka jingïashut tie breaker.
Ha ka Under-17 jong ki kynthei ka Kyrshai Govt. LP and UP School ka la ïoh khur ïa ka jingjop da kaba pynliem noh ïa ka Sib Sing Memorial Govt. Hr Sec School da 3-0 kol katba ha ka liang jong ki khynnah shynrang ha ka kyrdan Under-17 ka skul Borsing Memomorial Secondary School ka la ïoh ban khur ïa ka nam jop hadien ba ka la lah ban pynliem ïa ka St. Xavier’s Hr Sec School lyngba ka jingïashut tie breaker.
Ïa kane ka lympung la pynhap pyrda da u Asst. Agriculture Engineer (Mech) u bah GJL Sangriang uba la long kum u kongsan, ha ryngkat ka jingïadonlang ruh ka District Sports Officer ka West Khasi Hills ka kong ka kong B. Syiem, u President ka NDSA u bah B.S Kharlor kiba la sam ruh ïa ki khusnam sha ki nongjop.
