Indore, Jylliew, 11: U Sachin Raghuvanshi, u hynmen jong u Raja Raghuvanshi, uba la shah pynïap ha ka jingleit kai honeymoon ha Sohra, Meghalaya, u la panmap na ki paidbah bad na ka Sorkar Meghalaya halor ka jingshah kynthoh ba ka jylla ka la mad hadien kane ka jingjia kaba sngew shyrkhei.
“Nga kwah ban panmap ïa ka Sorkar Meghalaya ba tang na ka daw jong kawei ka briew ka Sonam Raghuvanshi, ka jylla Meghalaya ka la shah pynbudnam sniew,” ong u Sachin, da kaba pynpaw ïa ka jingsngewsih halor ka jingshah kynthoh ïa ka jylla hadien ka jingshah pynïap u para jong u.
U la ïaroh ïa ka jingtrei shitom halor kane ka jingjia da ki bor synshar. “Ki pulit ka Meghalaya ki lah ban lapdien ïa kane ka kam tang hapoh 17 sngi. Nga kwah ban ai khublei ïa ka Sorkar Meghalaya kaba la don ryngkat bad ngi. Ka sorkar Meghalaya ka la kitkhia ïa ki nongjngohkai pyrthei jong ka.”
Haba kyntu ïa ki bor ka aiñ ban leh da kaba tyngeh, u Sachin u la bynrap, “dei ban tohkit ïa baroh kiba shah kynnoh ha kane ka jingjia bad dei ban leh da kaba tyngeh pyrshah ïa ki. Ka Sonam Raghuvanshi ka la pynjot ïa ki hynriew tylli ki longiing. Dei ban leh da kaba tyngeh pyrshah ïa ka. Dei ban tohkit ruh ïa baroh ki dkhot jong ka ïing jong ka ha ka rukom kaba dei.”
Ka jingkren jong u Sachin ka long ha ka por ba ka Meghalaya ka dang ïakhun ïa ka jingbym shngaiñ jong ki paidbah ha ka jylla. Hynrei ki kyntien ba khlaiñ jong u ki pynskhem biang ïa ka jingshaniah ha ki bor synshar jong ka jylla bad ki long kum ka jingpynkynmaw ba ka jingleh kam sniew jong uwei kam dei ban shu kyllum lang ïa baroh.
