Shillong, Jymmang, 26: U MP ba marwei ka Rajya Sabha na Meghalaya u Dr WR Kharlukhi u la ong ba ka Sorkar ba la ïalam da ka NPP kan dang bteng ban bat ïa u lakam synshar hadien u snem 2028.
U la kyntait mardor ruh ba ka don kano kano ka jingïakynad hapoh ka Sorkar khleh khaw lang jong ka kynhun Meghalaya Democratic Alliance (MDA).
“Em (kam don kano kano ka jingïakynad). Kane ka sorkar kan neh haduh ban da kut ka samoi treikam bad ka rukom long jong ka saiñhima sima ngin dang bteng biang (ban thaw ïa ka sorkar ha u snem 2028),” la pynpaw u Dr Kharlukhi ïa ka jingshaniah haba kren sha ki lad pathai khubor ha ka Lah Sngi u Blei.
Halor ki khubor hamsaïa ba ki MLA ka NPP ha Khasi Hills ki lah ban ryngkoh sha ka Voice of the People Party (VPP) shwa ka elekshon 2028, u State President barim ka NPP u la ong, “tang lada ka VPP ka pynkheiñ ïa ki nongrim jong ki kumba ki la leh ha Jowai North MDC Constituency te kata ka dei ka kam kaba pher. Hynrei ki (VPP) nongrim jong ka, ki long ban ym pdiang ïa ki Sitting ML bad lada ka long kumta shano kine ki MLA kin leit? Hynrei kam don satia kaba kum kata.
“Ngin sa ïa peit ynda la poi ka eleksshon, lada kim (MLA) pan tiket shuh na ngi ka mut ba ka dei ka jingshisha ha nga hynrei kam don eiei kaba kum kata,” u la bynrap.
Lada ka VPP ka nang nang ïohbor ha ka jylla, u Dr Kharlukhi pynban u la ong, “Em, ngam ïohi kumta. Ngi la jop ha ka elekshon JHADC. Hangne ruh ha ka elekshon MP ba ladep, ki la jop 25 seat na ki 29 seat bad mynta ki la hiar sha ka 17 seat. Ngi don sa lai snem ban wan shwa ka elekshon. Namarkata, ngam ïohi ba kin (VPP) long ka jingma ïa ngi.”
Ha Jaiñtia Hills, u la ong, “ha ki ar tylli ki elekshon ba ladep, ngi (NPP) dei ka seng kaba heh tam ha ka thaiñ. Ngi don ïa ka jingïoh vote kaba bun tam. Ngi nang kiew bad ngi dang pynneh ïa ka jingkiew ka jingïoh vote. Mynta ka kynti ha ka elekshon JHADC, ngi la ïoh 13 ngut bad ha ka sien kaba ladep ngi la ïoh 12 ngut.”
“Ha Khasi Hills mynta ka kynti ngi la ïoh 4 Seat. Ka jingïapher ka long namarba ki MDC Constituency ki kham bun ne kham duna kum ki MLA Constituency. Ha ka sien ba ladep ha ka MLA, ngi la ïoh 4 tylli. Kumta ngi la neh 4 tylli. Ha ka elekshon ban wan nga tharai ba ngin sa nang kiew,” la kren pynskhem u Dr Kharlukhi.
Halor ka jingpyrshang jong ka VPP ban rung sha rilum Garo, u Dr. Kharlukhi u la ong, “nga tharai kan bha palat lada ki pyrshang. Haba phi don ïa ka party, pyrshang ban long kum ka party ha ka jylla baroh kawei ym tang hapoh kawei ka thaiñ. Kan bha palat lada ki pyrshang.”
 | ReplyForwardAdd reaction |
