Shillong, Jymmang 26: Ha kaba ïadei bad ka jingthurmur ka rukom pynlong ia ka eksamin NEET ha Jowai bad ha Nongpoh, ki samla pule kiba thoh ïa kane ka eksamin ha Jowai bad Nongpoh ba dang shu dep ki don ym duna ïa ka san spah ngut bad kane ka jingthurmur ka rukom pynïaid ka la pynduh mynsiem ïa ki khynnah kiba thoh ia ka eksamin NEET.
Halor kane ka JSU bad ka KSU ryngkat bad ki khynnah pule kiba thoh ïa ka eksamin NEET ki la phah da ka shithi ujor sha ka National Testing Agency (NTA) bad sha ka Sorkar Jylla ban pan jingshai ha ka rukom pynïaid eksam ha kine ki artylli Center hynrei mynta lah kumba ar taïew tam ym pat ïoh ïa ka jubab na ka NTA bad kane ka buh ïa ki khynnah ha ka jingdum haduh mynta.
Ha ka jingïalang ba dang shu dep ban pynlong ha Jowai ba la don lang ki khynnah pule kiba thoh ia ka eksamin NEET, ki kmie ki kpa ryngkat bad ki nongïalam ka JSU bad KSU na West Jaiñtia Hills District Unit ka lah mih ka sur jingpynrem jur ïa ka Sorkar Jylla namarba sha kiwei ki jylla kum ha ka jylla Telangana bad sha kiwei ki jylla ki ïoh ïa ka jubab na ka NTA halor ka jingthurmur ka rukom pynlong ïa ka eksamin NEET kaba ladep hynrei ka Sorkar Meghalaya kat haduh mynta kam pat ïoh jubab na ka NTA kumta kane ka kynhun hapoh ka jingïalang ka dawa da kaba tyngeh ïa ka Sorkar Jylla ba ka dei ban ïakren bad ki heh ka NTA na Delhi halor ka kaiphod kaba ka la phah napoh ka jylla bad ka NTA ka dei ban jubab kloi namar ka result jong ka NEET kaba mynta u snem ka lah jan ban mih.
