Shillong, Naitung, 21: U MP ba thymmai jong ka Shillong Parliamentary Seat u Dr. Ricky AJ Syngkon ha ka sngi Saitjaiñ u la ong ba ka Sorkar Jylla ka la sngewthuh bakla halor ka jingmang pisa kaba 290 klur da ka Ministry of Roads Transport and Highways ka Sorkar Pdeng na ka bynta ban shna pynbha ïa ka surokbah National Highway-6 ha East Jaiñtia Hills District.
Kane ka jingpynshai jong u MP ka long halor ka jingmih ki khubor hadien ka jingleit ïakynduh jong u ïa u Myntri ka Ministry of Roads Transport and Highways ka Sorkar Pdeng u Nitin Gadkari bad aiti ruh ïa ka shithi ba pynsngew halor ka jingjot bad ka jingdonkam ban maramot noh kham kloi ïa ka surokbah National Highway-6 ha East Jaiñtia Hills District kaba la pynsuhsat haduh katta katta ïa ka leit ka wan jong ki paidbah.
Ha ka jingïakren bad ki lad pathai khubor u Dr. Ricky AJ Syngkon u la ong, “ha ka por ba nga leit ai ïa ka shithi da ka jingsngewkhia, namarba nga hi dalade nga la mad ïa ka jingeh haba nga la leit sha katei ka thaiñ, nga leit rah ïa kato ka shithi ha ka 2 tarik bad ha ka 3 tarik u Myntri u la khot bad ha ka jingïakren nga sngewthuh ba ka don kata ka pisa, kawei kaba T.200 klur na ka bynta ka surok kaba la mang pisa bad ka T.90 klur kaba ladep mynjur ïa kaba ym pat mang pisa. Kata kaba ki kren ma ki bad ïa uwei u nongthoh khubor ruh nga ïathuh tang katta, ka sah tang katta.”
“Kaba sah pat, phi la ïohi patde, ka jingsngewthuh bakla jong ka Sorkar ïa kaei kaba u nongthoh khubor lehse u thoh ka bym shym don ka jingkren jong nga bad nga sngewba shwa ba ngin kren ïa kaei kaei ngi dei ban da pyndonkam ïa ka bor pyrkhat bad ka bor sngewthuh,” ula ong bad bynrap, kam lah hi ruh ban long ba tang shu ai iwei i shithi ha ka sngi kaba bud pat yn ïoh noh. Ka lah seh ban long?
“Kum ka party ngin nym shim burom ïa kaei kaei baroh. Ka long biej wat ïa nga hi ruh ban shim burom kum ïa kata. Hynrei kaba sngewsih ïa ka Sorkar Jylla ka wanrah ïa ka jingsngewthuh bakla,” u la ong.
Haba pynpaw ba ka jingmang pisa ka Sorkar Pdeng kan long ka jingkyrkhu ïa ki paidbah u Dr. Syngkon u la ong, “ha kawei pat ka liang, kan long ka jingkyrkhu ïa ka Sorkar ba na kata ka pisa ynda la dei ka por ban pyntreikam u paidbah un buddien ba kan ym jah shi naïa ruh na kaei kaba ka Sorkar ka la mang. Nangne shakhmat ngi kyrmen ba kino kino ki skhim kaba na ka bynta jong u paidbah ba kan leit sha u paidbah bad ka shong ha u paidbah ba un buddien bad ban ym ailad. Ha ka synshar paidbah ka bor ka shong ha u paidbah.”
