Shillong, Nailar 31: U MDC ka BJP na Tura u Bernard N Marak u la ong ba ka Sorkar Jylla kam lah satia ban tuklar bad ban shim noh ïa ki bhah bad ki khajna ba mih na ki marpoh khyndew kiba dei hok ban ïoh da ki Autonomous District Council (ADC).
Kane ka jingkynthoh jong u ka long ha kaba ïadei bad ka hukum kaba ïadei bad ka jingbei tyngka kaba bei beit na ka sorkar pdeng bad ban lait na ki jingpyndonkam bakla ïa ka pisa ha ki Autonomous District Councils (ADCs), ka State Finance Commission (SFC) kaba la thaw ha ka snem 2012 ha kaba ka khlem thaw haba ïadei bad ka jingpynkheiñ ïa ka Paragraph 7.7 ka Garo Accord.
Katkum ka jingïamynjur ne ka Accord, ka la kdew shai bha shaphang ka jingdonkam ban thaw ïa ka independent body kum ka State Finance Commission ban pynkylla ïa ki nongrim ha kaba ïadei bad ka jingbhah ïa ka pisa bad ka jingïasam ïa ki khajna hapdeng ka sorkar jylla bad ki bor pynïaid ki Autonomous District Council.
U la ong ba ka sorkar pdeng bad ka sorkar jylla ki dei ban sdang ïa ki sienjam ban pynkylla kiba kongsan ha ki riti synshar jong ka ri bad kiwei ki aiñ ba la thaw da ki nongsaid aiñ ne ki Procedural Regulatory regime.
U la kynnoh ba kane ka jingïamynjur la pynkheiñ da ki ophisar jong ka sorkar jylla kiba khlem shim ïa ki sienjam kiba kongsan ban pynkhiah ïa ki jingeh ba kynduh da ki Autonomous District Council jong ka jylla Meghalaya.
