Shillong, Nailar, 19: Ka Myntri ka Koit ka Khiah ka Sorkar Jylla ka Dr. Ampareen Lyngdoh ka la ïathuh ba ka jingtyrwa ban kyntiew ïa ka pisa ba ïateh kular (bond amount) na ka bynta ki doktor kiba leit pule na ka bhah kyrpang kiba kyrngah ban wan phai sha ka jylla Meghalaya, ka dang don hapdeng ka jingbishar jong ka Sorkar Jylla.
“La ngi lah ne ngim lah ban pynkiew shuh shuh ïa ka bond ka dei kaei kaei kaba dang don ha ka jingpyrkhat,” la ong ka Dr. Ampareen ha ka jingïakren bad ki lad pathai khubor ha ka sngi Baar.
Ka jingkren jong ka Myntri ka long hadien ka jingdawa ba dang shen jong ka Hynñiewtrep Youth Council (HYC) ban leh da kaba tyngeh pyrshah ïa ki samla pule MBBS ki bym shym la pyntip sha ka Sorkar hadien ba ki la pyndep ïa ki jingpule jong ki.
Ka Myntri ka la pynpaw ïa ka jingkyrmen ba ka Sorkar kan sa lah ban bishar bniah ïa kane ka kam da kaba shim ïa ka rai kaba ai jingmyntoi ïa ka jylla bad ki paidbah.
Ka HYC ka la ai jingmut ba dei ban kyntiew ïa ka Bond sha ka T.1 klur ka ban treikam naduh ka Academic Session 2026-27.
Ka HYC ka la sot ïa ka jinglap na ka jubab RTI kaba pynpaw ba hapdeng u snem 2015-2016 bad 2019-2020, ka Sorkar Jylla ka la bei pisa ïa ki 359 ngut ki samla ban leit pule MBBS, hynrei 96 ngut ki samla pule kim shym la pyntip sha ka Sorkar ban pyndep ïa ki kyndon jong ka Bond-cum-Agree.
Ka Dr. Ampareen ka la banjur ba ka jingïatai halor ka Bond bad ka jingpynbor ïa ki doktor ban soi ïa ki Bond katkum ka aiñ kam dei kaba thymmai bad ka la neh la bun bun snem.
Ka Myntri ka la pynpaw ba ka Sorkar ka la mad jingeh ha kaba ïadei bad ki doktor ki bym shym la wan phai sha ka jylla hadien ba ki la pyndep ïa ki jingpule jong ki.
Hynrei da ka jingwan jong ka Meghalaya Medical Registration Council (MMRC) ka jinglong jingman ka la kham bha bad mynta ki samla pule ki hap ban pynrung kyrteng noh ha ka State Board hadien ba ki la pyndep ïa ka jingpule MBBS.
“Kumta kiei kiei ki la kham bha. Ngi sngewnguh ïa u Myntri Rangbah bad ïa ka Kynhun Myntri ba ki la mynjur ïa ka jingthoh jong ka Kynhun Myntri kaba la pynlong ïa kane ka Board.
Ka la kdew ruh ba ka pisa ïateh ha ka Bond la pynkiew naduh ki snem ba la leit noh.
“Hooid, ha kawei ka khep ki samla pule ki hap ban ai kumba T. 34-35 nangta la pynkiew sha ka T. 40 haduh T. 46 (lak) bad ki jingkheiñ ki nang kiew hynrei ngi la ïohi ba ki nongwan phai kim shah pynthut da kaba soi ïa ka Bond. Kam dei ka jingkitkhlieh ïa ka pisa kaba dei ban ïalam ïa ki samla pule Meghalaya jong ngi,” ka la ong.
Hynrei ka la ban jur ba ka jingpyrkhat ka dei ban long ban pynshlur ïa ki samla pule ban wan phai noh sha la ka jylla bad ban shakri ïa la ki jong ki briew ym tang ka jingkitkhlieh pisa.
Ka Myntri ka la pynpaw ka jingkyrmen ba ka Sorkar kan sa lah ban bishar bniah ïa kane ka kam da kaba pynmih jingmyntoi bad ban shim ïa ka rai kaba ai jingmyntoi ïa ka jylla bad ki paidbah.
“Kumta bun na ki samla pule jong ngi ki dang ïashim bynta ha baroh kine ki prokram bapher bapher ha kylleng ka ri hadien ba ki la pas ïa ka NEET bad bun ki jinghikai kiba don hangta. Ki doktor jong ngi ki don shabar ban ïoh ïa ka jingnang jingstad bad ki kyrdan pule kiba kham shalor hynrei ngi kwah ban ïohi ba kin wan biang sha la ka jong ka jylla ban ai jingshakri,” ka la bynrap.
