Shillong, K’ Lyngkot 07: U Chief Secretary ka jylla u Bah DP Wahlang ha ka sngi Baar u la ong ba ka Sorkar haduh mynta ka dang plie ïa ka jingkhang îa ka seng kieng atiar Hynñiewtrep National Liberation Council (HNLC) ban wan sha ka miej jingïakren ïasuk.
Kane ka jingkren jong u ka long hadien ba la jan dap shisnem ba ka HNLC ka la weng noh na ka jingïakren hapdeng ki lai kynhun na ka bynta ban ïakren ïasuk bad ka sorkar pdeng bad ka sorkar jylla da kaba kynnoh ba ki 5 tylli ki mat jingdawa kaba kynthup ïa ki jingmab noh ïa baroh ki kam beaiñ ba la shah pynngat kyndon kiba haduh mynta khlem da lah ban pynurlong.
Haba kren sha ki lad pathai khubor, u Bah Wahlang u la ong ba ki jingïakren dei ban sdang biang hadien ba baroh ki kynhun ki la shim ïa ka rai ban sdang biang ka jingïalang.
“Ha kum kane ka por, ngi angnud ban bteng biang bad ki jingïasyllok hynrei sniewbok, ki don katto katne ki bynta, ha kaba ki bynta kiba long kiba kham eh ha kaba na ka liang jong ki, ki sngewkhia bad kumjuh ruh na ka liang jong ngi bad ngi khlem da la lah shuh ban pynlong ka jingïakynduh na ka daw jong kine ki kam bad ki bynta kiba don la ki jong ki jingsngewkhia,” u la ong.
“Namarkata ngi kyrpad biang ïa ki ba kin leit phai biang sha ka jaka ba ki wan bad ban don shwa ka jingïakren kaba biang ba kin ïasyllok shwa nyngkong bad hadien ba ka la don ka jingshai kaba pura bad hadien ba ngi la poi ha ka bynta jong ka jingïabeit lang kumta ngin sa sdang biang ïa ki jingïakren. Kumta ki la leit phai biang bad ki la ïakynduhlang para maki hynrei ki khlem wan shuh sha ngi ban bteng biang ki jingïakren. Kumta ngi dang ap, ki jingkhang jong ngi ki dang plie bad kane kadei ka kam kaba kongsan tam,” bynrap u Bah Wahlang.
Haba kylli, na ka liang u chief secretary u la ong ba ki la don katto katne ki bynta kiba ym lah ban pynjem bad ki don katto katne pat kiba lah ban pynjem ha ka jingïakren kaba nyngkong jong ka jingïakren ïasuk.
“Kumta haba ka long kaba ym lah ban pynjem kumta ngi hap ban shim ïa ka jingpyrkhat lang jong ka Ministry of Home Affairs kaba long pdeng halor kine ki kam bym lah ban pynjem kiba ym lah ban ïasuk,” u la bynrap.
