Shillong, Nailar 22: Ka Myntri ka Koit ka Khiah ka kong Ampareen Lyngdoh ka la ong ba ki jaka sumar jong ka jylla ki dang hap ban long kiba la biang ban sumar ïa ki jingpang kiba kyllaiñ kiba la mih na ki kam kyrni ha ka jingdih ïa u drok.
Ka la ong ban pynbeit ïa kane ka sorkar ka dang pynkhreh ban thaw ïa ki lad ki lynti kiba biang halor ki lad jingsumar kiba lah ban ai ka jingsumar kaba neh slem na ka bynta ki briew kiba ïakhun na kane ka jingkyrni dih drok.
“Ka jingpyndonkam ïa u drok ha Meghalaya suki suki ka la sdang ban kiew bad kum ka myntri kaba don ka jingsngewkhia, nga pynpaw ka jingshisha ba ki jaka sumar jong ngi ki dang hap ban ïoh ki tiar kiba biang ban pynbeit ïa kane ka jingai jingsumar kaba kyllaiñ bad ki jingdonkam ban shim iï ka rai halor ka jingkiew sted jong kane ka jingeh.
“Ngi dang trei halor kane. Ngi dang pyrshang ïa kaba bha tam ban pynthikna ban lah ban leh eiei ha ka por kaba lyngkot, ngi dei ruh la kumno kumno ban ïoh ki lad sumar kiba lah ban pynbeit ïa kane ka jingeh,” ong ka Kong Lyngdoh sha ki lad pathai khubor ha ka sngi Thohdieng.
Ka la pynbna ba la thaw ïa ka inter-departmental committee, kiba kynthup ïa ki nongmihkhmat na ka tnat ka Koit ka Khiah, ka social welfare bad ka pule puthi ban wanrah ïa ki plan ban ïakhun ïa kane ka jingeh ba mih na u drok.
“Kum ki dkhot ka committee kin sa ïathoh lang ïa ki sienjam kiba kongsan kiba donkam ban shimkam mardor,” ïathuh ka Myntri.
Ka Kong Lyngdoh ka la kdew ba donkam ban buh ki dawai bad ki lad ai jingsumar kum ha ki Community Health Centre (CHCs), ban sumar ïa kiba la kyrni ha ka jingdih drok.
Ka jingkren jong ka Myntri ka long hadien ka jingmih na ka jingjia jong kawei ka khynnah skul kaba la shah dung da u thyrnia ha kaba kane ka la wanrah ka jingmynsaw bad ka jingma ïa ka koit ka khiah jong ka.
Ka la pyntip na ka women’s wing ka National People’s Party ka la leit jngoh ïa ka nongpang ha hospital.
“Kine ki jingjia ba dung da u thynia ki dei kiba ym ju khamjia koit hynrei kidei pat kiba pynkyndit bynriew bad ka sorkar kadei ban shim khia bha ia kane. Kam dei tang ban kem ïa ki runar hynrei ban wad kaei kaba jia shisha bad kiei ki daw bad kaei kaba ïalam sha kata,” ong ka Kong Lyngdoh.
Ka Myntri ka la banjur halor ka jinglong kongsan ka jingpyntreikam ïa ka Drug Reduction, Elimination, and Action Mission (DREAM), kaba ka ngeit ba ka don ka lad ba la tyrwa bad kaba don ka jingtuklar, ki sienjam ban pynbeit ban ïakhun ia ka jingeh ba mih na u drok ha ka jylla.
“Ngi la ngat ha kane ka jingeh bad ngi tip kaei kaba donkam ban leh,” ka la ong.
Shuh shuh ka myntri ka la pyntip ba ka sorkar shen kan pynbna ïa ki centre ban sumar ïa kiba dih drok ha Shillong bad Tura.
Ka la ïathuh ruh ba ka jylla mynta ka la don ruh ïa ka women rehabilitation center.
