Shillong, Nailar, 31: Ka jingjyllei jong u drok ha ka jylla Meghalaya ka la pynmih ka jingsngewkhia bad jingsngewkhuslai ha ki shnong ki thaw. La sakhi ba kane ka jingeh ka ktah jur ïa ka pule puthi bad khamtam eh ïa ka lawei jong ki khynnah bad ïa ka suk ka saiñ jong ki longïing longsem.
U Rangbah Shnong ka Mawkhar, Bah Ransom Sutnga ha ka jingïakren bad u nonglum khubor u la ong, “ka shnong Mawkhar ka dei ka shnong kaba don hapdeng ka sor bad ka jingjyllei (jong u drok) ka long kaba haduh katta katta ha ki snem ba la leit noh. Kum ka Dorbar Shnong ngi don ka jingkitkhlieh kumno ban ïada ïa ka jingwan tyllep jong u drok hapoh shnong.”
Haba pyntip ba ka Dorbar Shnong ka sngew ba donkam ban don da ki sakhi sabut haba ïohkem ïa ki nongkhaii bad ïa ki nongdih drok, u la ong ba ka Dorbar Shnong Mawkhar ha u snem 2018 ka la pyndait da ki CCTV ha baroh kawei ka shnong Mawkhar.
“Ngi la pynkhlaiñ ïa ki lad ban syntiat lyngba ki CCTV wat sha ki kyndong kynshrot jong ka shnong ryngkat bad ki Solar Light. Ngi sngewthuh ba ka jingdon jong ki CCTV ka ïada ïa ki briew kiba wan khaii ïa u drok bad ïa ki nongdih drok hapoh ka shnong ka thaw.
U la ong ba ka donkam eh ïa ka Sorkar ban pyntreikam ïa ka Narcotic Drugs and Psychotropic Substances (NDPS) Act ha ka rukom kaba dei.
U la ong ba la donkam ruh ban pynbha ïa ki aiñ kiba ïadei bad ka jingkhanglad ïa ka jingjyllei jong u drok hapoh ka jylla.
Haba kylli u la ong, “ha ka Meghalaya Residents Safety and Security Act, 2016 ka donkam ban wanrah ïa ka jingpynbeit thymmai khamtam ha ka Form A bad Form B. Ngi la ai jingmut ba ïa ka form dei ban soi da ka Dorbar Shnong ym da ka Sorkar namar kiba kham tip kham bha ïa ki trai iing bad ïa ki nongshongwai ki dei ki Dorbar Shnong.”
Katba u Rangbah Shnong ka Nongrim Hills, Bah BantylliLang Nari, u la kyntu ïa ki MLA ba kin ïakren ha ka Dorbar Synrai na ka bynta ban wanrah ïa ka Aiñ-rew kaba kham pyrkhing ïa ki nongdih bad ïa ki nongkhaii drok kiba ïai pynkheiñ bun bun sien ïa ki kyndon aiñ.
“Ïa ki briew kiba khaii ïa ki jingdih pynbuaid ba la kheiñ beaiñ ki dei ban ngat ha ka jingshah pynshitom hynrei ym ban shu pyllait noh tang ha ka thanat. Kata kan nang pynsniew shuh shuh bad kata ka nang pynshrai shuh shuh ïa ki khun samla jong ka shnong, ïa ki nongshong shnong, ïa ngi ki nongpynïaid kam shnong haba ïohi ïa ki nongpynkheiñ kiba shah kem ki lait da kaba suk,” la ong u Bah Nari.
“Lada ngim lah ban tehlakam ïa kane kin sa nang kham sniew shuh shuh nangne shakhmat,” la maham u Rangbah Shnong ka Nongrim Hills.
