Shillong, Ïaïong, 15: U State President barim ka NPP uba long ruh u MP ka Rajya Sabha Dr WR Kharlukhi ha ka sngi Baar u la ong ba ka ka ishu lynti Rel ha ka jingshisha ka la kut namarba ka Sorkar Jylla ka ladep pynphai ïa ka pisa T. 200 klur ba la mang da ka Sorkar Pdeng na ka bynta ban siew bailutksan sha ki trai jaka khnang ban wanrah ïa ka lynti rel sha ka Jylla.
“Ka Sorkar Jylla ka ladep pynphai ïa ka pisa namarkata kane ka sobjek ka la kut noh hangne hi,” ong u Dr. Kharlukhi ha ka jingïakren bad ki lad pathai khubor haba kynthoh halor ka rai ba la shim da ka Sorkar ban thaw ïa ka All Party Committee on Railway ban eksamin ïa ka jingpynïasoh lynti Rel ha rilum Khasi bad Jaiñtia jong ka Jylla.
“Mynta haba ki (Sorkar) ladep pynphai ïa ka pisa naei pat kin ïoh pisa biang,” u la buh jingkylli.
Katkum ka jingong jong u, ka jingtyrwa ban don ïa ka jingïalang ka lah ban long na ka bynta ka jingpynpoi ïa ka lynti rel ha ki snem ban sa wan.
Halor ka rai jong ka VPP ban ym ïashim bynta ha ka All Party Committee on Railways, u Dr Kharlukhi u la ong, “ka sorkar ka donkam ïa ka liang pyrshah kaba lah ban ai jingmut. Ngam lah ban tip namarba lada ym don ha ka jingïalang hato kan long kaba tei ne kaba pynjot, ngam tip.”
