Shillong, Naiwieng 22: Ka Khasi Students Union (KSU) ha ka sngi balang ka la teh da ki Banner bad ki Poster ha kylleng ki bynta ka sor Shillong ban pynkynmaw ia ka Sorkar Meghalaya Democratic Alliance (MDA) ba la ialam da ka Nationa People’s Party (NPP) ba kan shimkhia ban pynioh ia ka hok jong ki san ngut ki Khasi-Pnar kiba la duhei ia la ka jong ka jingim ha ka 22 tarik u Naiwieng, 2022 ha ka jingshah synreit kuli ha ki nongap pahara khlaw bad ki Pulit ka Jylla Assam ha ka shnong Mukroh, West Jaiñtia Hills District.
Ki san ngut ki Khasi-Pnar kiba la duhei ia la ka jong ka jingim ki long u Tal Nartiang, u Thal Shadap, u Six Talang, u Shirup Sumer bad u Si Dhar.
Ka Sorkar Assam bad ka Sorkar Meghalaya ha ka 30 tarik u Nailur, 2023 ki la rai ban aiti ia ka jingtohkit ia ka jingjia ha Mukroh sha ka Central Bureau of Investigation (CBI). Ia ki Judicial Commission ba la thaw da ki ar tylli ki Sorkar Jylla ban tohkit halor kane ka jingjia la pynkut noh shisyndon hadien ba u Myntri Rangbah ka Jylla Assam u Himanta Biswa Sarma bad u Myntri Rangbah ka Jylla Meghalaya u Conrad K. Sangma ki la iakynduh ban iakren ia pynbeit ia u pud u sam ha Khanapara.
Ki jaka kiba ka KSU ka la wah ia ki Banner ki long ha Secretariat bad ha Khyndai Lad ha kaba ki Pulit ki la weng noh tang hapoh khyndiat por. Kiwei pat ki jaka ki long hakhmat u durmot jong u Kiang Nangbah, ha Motphran, Laitumkhrah bad ha GolfLinks.
Hadien ba ki Pulit ki la weng ia ki Banner, ka KSU hapoh ka jingialam jong u General Secretary u samla Donald V. Thabah ki la leit teh biang ha ka wat kaba ar ha Khyndai Lad bad hakhmat ka ophis jong ka Deputy Commissioner ka East Khasi Hills.
“Mynta u snem ngi leh ia ka Poster bad Banner Campaign ka dei ka jingkynmaw bad ka jingai burom ia ki san ngut kiba la aiti ia la ka jong ka jingim na ka bynta ka ri bad ka jaidbynriew. Kane ka long ban pynkynmaw ia ki paradoh parasnam ba ka jaidbynriew jong ngi ka don ha tmier ka riat bad ha kano kano ka por ngi lah ban shah thombor. Ngi la iohi ia kaei kaba jia ha Langpih, ha Madan Umwang, hajan Block-I bad ha Lapangap bad ngi pynsngewthuh ia ki (paradoh parasnam) ba ngi dei ban long kiba la khreh ban ieng na ka bynta ka ri bad ka jaidbynriew,” u la ong.
Haba kynthoh ia ka jingweng ki bor Pulit ia ki banner ba la teh da ka KSU, u samla Thabah u la ong, “ka long kaba lyngngoh ha ki katto katne ki thaiñ ba ngi wah, ka sorkar ka ialeh ban weng ia ki Banner bad kane ka pynlynngoh ia ngi haba tang ia ki Banner ruh ki weng, katba kiwei kiwei ki kynhun ki bym dei na ka jaidbynriew jong ngi ki wah ia ki Banner ha Khyndai Lad ym ju don ba weng bad ki neh da ki bnai, katba ia ki jong ngi mar syn wah, mar syn weng.”
“Kane ka pynpyrkhat lehse, namarba ka dang don ka prokram jong ka tnat Sorkar ha kaba ki heh ki haiñ na kylleng ka thaiñ Shatei Lammihngi bad na ka ri India ki wan sha kane ka jylla ban iashim bynta ha kata ka prokram, ka sorkar kam kwah ban pyni ba ka jylla ka don hapdeng ka jingshah thombor, ka don hapdeng ka jingshah banbeiñ bad ka jingshah pyniap na ka por sha ka por. Lehse ba ki don ki heh ki haiñ na Assam ha kaba lada ki iohi ia kine ki Poster ka pyntieng ia ka Sorkar Meghalaya ioh ki shah kynhied ne ki shah mai ha ki heh Sorkar Assam,” la kynthoh u samla Thabah.
“Ka jingkylli kaba ngi hap ban pyrkhat mynta ka long lada tang ban wah ia ki banner ruh kim nud ban pyni hakhmat ka Sorkar Assam mutdur ynda ki la don ha ka miej jingiakren ban iapynbeit ia u pud u sam paramaki, hato ki nud ne kim nud ban ang ia la ka shyntur ban kam ia ka Mukroh, ia ka Lapangap, ia ka Khanduli, ia ka Langpih bad kumta ter ter ki thaiñ khapppud kiba don hapdeng ka jingiakajia,’” la buh jingkylli une u nongialam ka General Secretary ka KSU.
