Shillong, Jymmang, 23: U Nongïalam ka Liang Pyrshah u Dr. Mukul Sangma u la kynthoh ïa ka sorkar jylla ba ka la “ pynkulmar jingmut” halor ka jingtyrwa ban pyntreikam ïa ka projek lynti rel ha rilum Khasi-Jaiñtia.
“Ki la pynkulmar. Ngi don ha ka jingkulmar namarba ka Sorkar kam long kaba tbit”, la ong u Dr. Mukul ha ka jingïakren bad ki nongthoh khubor ha ka sngi Thohdieng.
U Mukul u la jubab halor ka jingkylli lada ka jingpyrshang jong ka Sorkar ban khot ïa ka jingïalang jong baroh ki seng saiñpyrthei kan long lehnohei namarba ki kynhun seng ki la pynskhem ba kin ym ailad ban pyntreikam ïa ka projek lynti rel lymda don ïa ki lad jingïada kiba khlaiñ bad ki aiñ bapyrkhing kum ka Inner Line Permit (ILP).
Da kaba pynpaw ba ka jingpyrshah pyrshah ïa ka projek lynti rel ha ka thaiñ ka dei namar ka jingduna jingshaniah ha ka sorkar, u Myntri Rangbah barim ka jylla u la ong, “kane ka long namarba ka Sorkar kam shym la lah ban pyni ïa kano kano ka jingleh kaba lah ban bsut ïa ka jingshaniah bad jingsngewskhem ha ki paidbah bad kin dang don bun ki jingjia ki ban nang pynmih shuh shuh ïa ka jingduna jingshaniah.”
“Ka dei thik namarba kane ka jingduna jingshaniah ka long ba ki briew ka rilum Khasi ki la kyntait ban thep ai vote bad jied dkhot ha KHADC. Ka jingjop ha rilum Jaiñtia ha JHADC ka long kaba hap ban bishar bniah. Ladep pynpaw ruh ïa kane hakhmat ki paidbah nongshong shnong ka jylla ha ka Assembly da ki dkhot,” u la ong.
Haba kylli halor ka nongrim jong ka TMC hadien ka jingshim rai jong ka seng Congress bad ka VPP ban kyntait ïa ka All Party Committee on Railways, u Dr. Mukul u la ong, “nga dang bishar bniah ïa ka jinglong jingman baroh kawei.”
Shuh shuh, u Dr. Mukul u la kdew ba baroh ki seng bhalang bapher bapher ki la pyrshah ïa ka lynti rel namarba ki ladep pynpaw hakhmat ka Sorkar.
“Kumta, ka jingïakren ka dei ban long ha kata ka rukom bad kumta ïa ka rukom treikam baroh kawei dei ban ïakren bad ki seng saiñpyrthei – phim lah ban khot ïa baroh bad pynlong ïa ngi kum shi bynta jong kata ka jingïakren. Kaei kaba khanglad ïa ka Sorka ban khot ïa ki nongïalam jong kine ki seng saiñpyrthei nyngkong eh band ban ïakren ïa kata hynrei ki la jied ban phah ïa ka shithi ban ong phah da u nongmihkhmat. Kin leit bad kin ïakren ïa kaei? Kiei ki jingïakren. Kiei ki jingsngew? Kumno kan long ka jingïakren,” la buh jingkylli u Dr. Mukul.
“Mynta, ki sengsaiñ pyrthei kim lah ban don lang ha ka jingïakren bad ki sengbhalang haba phim don ka jingshai kaba pura halor ka rukom treikam jong ka Sorkar. Namarkata, ka long kaba donkam ïa ngi ban sngewthuh ïa ka jingdonkam ban ïakren ha ki bynta bapher bapher. Lehse katto katne ki jingai jingmut kin wan na kiba bun na ngi – nga tharai ba ka rukom treikam ka dei ban long kumne,” u la ong.
Ha ka jinglong Myntri Rangbah jong u, u Dr. Mukul u la ong ba u la lah ban pynkohnguh ïa ka Sorkar India ban pynsangeh shwa ïa ka jingtih Uranium.
 | ReplyForwardAdd reaction |
